Ձեր վստահելի աղբյուրը

Սուրբ Սարգիս զորավորի տոնի առթիվ՝ փետրվարի 11-ին, Առաջնորդանիստ Սուրբ Սարգսի եկեղեցի է տարվելու՝ Մայր Աթոռ սուրբ Էջմիածնից Ս. Սարգսի աջը, Մատենադարանից՝ Ս. Սարգիս եկեղեցում արտագրված 17-րդ դարի Ավետարանը: Ժամը 10.30-ին առաջնորդանիստ Ս. Սարգիս եկեղեցում  ԱՀԹ առաջնորդական փոխոնորդ գերաշնորհ Տ. Նավասարդ արքեպիսկոպոս Կճոյանի հանդիսապետությամբ  կմատուցվի  պատարագ: Ս. Պատարագի ավարտին զինվորների ու երիտասարդների օրհնության կարգ կկատարվի: Լրագրողների հետ հանդիպմանը Սուրբ Սարգսի տոնի առթիվ կազմակերպվելիք  միջոցառումների մասին տեղեկացրեց Արարատյան Հայրապետական թեմի առաջնորդանիստ Սուրբ Սարգիս եկեղեցու և երիտասարդական կառույցների հոգևոր հովիվ Տեր Պետրոս ավագ քահանա Մալյանը:

Քահանայի խոսքով, քանի որ տոնը նվիրված է զինվորականի, արդեն երկու տարին է Տ. Նավասարդ արքեպիսկոպոս Կճոյանի օրհնությամբ կատարվում է նաև զինվորների պարգևատրում: Նա նշեց, որ այդ օրը պատարագին  ներկա են  լինելու նաև ՀՀ նախագահ Սերժ Սարգսյանը, պաշտպանության նախարար Վիգեն Սարգսյանը, և  պարգևատրվելու է 20 զինվոր, ովքեր այս պահին ծառայության մեջ են ու ծառայության ընթացքում աչքի են ընկել իրենց քաջագործությամբ, սխրանքներով, պարտաճանաչությամբ:

«Կարծում եմ, որ Հայաստանի նախագահի,  պաշտպանության նախարարի կողմից էլ կլինեն որոշ անակնկալներ մեր հերոս զինվորներին»,- ասաց նա՝ հավելելով, որ զինծառայողներին ընտրել է պաշտպանության նախարարությունը:

Քահանան և Հայաստանի պետական ֆիլհարմոնիայի տնօրեն, ՀՀ մշակույթի վաստակավոր գործիչ Գագիկ Մանասյանը մանրամասն ներկայացրեց, թե տոնի առիթով ինչ միջոցառումներ են կազմակերպվելու:

Գ. Մանասյանն ասաց, որ Երևանի տարբեր հարթակներում, նաև Վանաձորում, Գյումրիում կազմակերպվելու են տարաբնույթ մշակութային միջոցառումներ՝ ընդգրկելով արվեստի տարբեր ճյուղերը:

Ամենայն Հայոց Գարեգին Բ հայրապետի տնօրինությամբ Ս. Սարգիս զորավարի տոնը հռչակվել է Երիտասարդների օրհնության օր: Ս. Սարգիս զորավարն ամենասիրված սրբերից է: Իր որդու` Մարտիրոսի և 14 քաջ մարտիկների հետ նա նահատակվել է հանուն քրիստոնեական հավատքի: Արիության համար Ս. Սարգիսը Մեծն Կոստանդիանոս կասյեր (285-337) կողմից կարգվում է իշխան և սպարապետ` Հայաստանին սահմանակից Կապադովկիայում: Նա ոչ միայն գերազանց սպարապետ էր, այլև հիանալի քարոզիչ: Օգտվելով կայսեր հոժարությունից` իր իշխանության տակ գտնվող քաղաքներում քանդում է մեհյաններ, կառուցում եկեղեցիներ, տարածում քրիստոնեությունը: Երբ Հուլիանոս Ուրացողի թագավորության օրոք (360-363) սկսվում են Քրիստոսի եկեղեցու հալածանքները, Ս. Սարգիսը, աստվածային հայտնությամբ հրաման առնելով հեռանալ կայսրության սահմաններից, իր որդի Մարտիրոսի հետ գալիս, ապաստանում է քրիստոնյա Հայաստանում, ուր թագավորում էր Տիրան արքան` Մեծն Տրդատի թոռը` Խոսրովի որդին: Տեղեկանալով, որ Հուլիանոսը մեծ զորքով շարժվում է Պարսկաստանի վրա, Հայոց արքան, ձգտելով իր երկիրը զերծ պահել հարձակման վտանգից, հորդորում է Սարգսին ծառայության անցնել Շապուհի մոտ: Շապուհը սիրով ընդունում է Ս. Սարգսին և նշանակում նրան զորագնդերի հրամանատար: Զորականներից շատերը, տեսնելով փայլուն զորավարի բարեպաշտությունն ու վարքով վկայած նվիրումն առ Աստված, իր աղոթքներով Տիրոջ գործած հրաշքները, հրաժարվում էին հեթանոսությունից և դառնում քրիստոնյա: Սակայն Շապուհը պահանջում է նրանից պաշտել կրակը և զոհ մատուցել: Զորավարն անմիջապես մերժում է այն` ասելով. «Երկրպագելի է մեկ Աստված` Ամենասուրբ Երրորդությունը, ով ստեղծել է երկինքն ու երկիրը: Իսկ կրակը կամ կուռքերը ի բնե աստվածներ չեն, հողեղեն մարդը դրանք կարող է փչացնել»: Այդ խոսքերից հետո Ս. Սարգիսը կործանում է բագինը: Զայրացած ամբոխը հարձակվում է Ս. Սարգսի և նրա որդու վրա: Առաջինը նահատակության պսակն ընդունում է նրա որդին` Մարտիրոսը: Ս. Սարգիսը բանտարկվում է և աներեր մնալով իր հավատքի մեջ` գլխատվում: Նահատակվելուց հետո Ս. Սարգսի մարմնի վրա լույս է ծագում: Քրիստոնեական հավատքի համար նահատակվում են նաև Ս. Սարգսին հավատարիմ տասնչորս զինվորները: Հավատացյալները նահատակների մարմիններն ամփոփում են Համիան քաղաքում:

Ս. Սարգիսը հայոց մեջ ամենասիրված սրբերից է և պատահական չէ, որ Ս. Մեսրոպ Մաշտոց վարդապետը նրա մասունքները բերում է Ուշի (Աշտարակի շրջան)՝ տեղում կառուցելով երանելու անունը կրող եկեղեցի: