Ձեր վստահելի աղբյուրը

Բնապահպան Կարինե Դանիելյանը հետևելով նախընտրական թոհուբոհին նկատել է, որ ընտրությունների պատրաստվող ուժերից ոչ մեկը էկոլոգիական խնդիրների մասին որևէ խոսք չի ասել: «Հանուն մարդկային կայուն զարգացման» ՀԿ նախագահն ուսումնասիրել է ՄԱԿ-ի՝ Հայաստանի կայուն զարգացմանն ուղղված բոլոր ռազմավարական ծրագրերի հետազոտությունների արդյունքները:

«Հիմնականում բացթողումները էկոլոգիական խնդիրներն են: Դրանք բացակայում են»,-ասաց նա:

Դանիելյանն ընդգծում է՝ Հայաստանում  բնապահպանական խնդիրները շատ-շատ են. «Մենք մեծ քայլերով գնում ենք էկոլոգիական ճգնաժամի»:

Մի քանի այլ բնապահպանների հետ համատեղ կոչ են ուղղել քաղաքական ուժերին, ներկայացրել ահազանգող խնդիրները՝ ակնկալելով լսել, թե ինչպես են կուսակցություններն ու դաշինքները պատկերացնում այդ խնդիրների լուծումը:

Հետագայում Էկոլոգիական դաշինքի անդամ 52 ՀԿ-ների ներկայացուցիչները մոնիտորինգ են իրականացնելու, թե որ ուժն է այդ խնդիրների  մասին բարձրաձայնում, ինչ լուծումներ է մատնանշում: Դրանից հետո բնապահպաններն իրենց կարծիքը կհայտնեն ընտրազանգվածին:

«Մեր ամենամեծ մտահոգությունն արդյունաբերության էքստենսիվ զարգացումն է, մենք երկիրն ուղղակի կտրում ենք բնական ռեսուրսներից, ծածկում ենք պոչամբարներով, խիստ վնասում ենք և շրջակա միջավայրը, և կենսաբազմազանությանը, և մարդկանց առողջությանը,  ինչն արդեն ապացուցված է: Հիմքից վնասում ենք գյուղատնտեսության, տուիզմի զարգացմանը: Մենք արդեն 400 հանքավայր ունենք, որից 30-ը մետաղ պարունակող են, 21 պոչամբար ունենք ու անընդհատ ավելացնում ենք դրանց քանակը»,-ասաց նա:

Դանիելյանի խոսքով, խիստ մտահոգիչ է նաև Արարատյան արտեզյան ջրավազանի իրավիճակը. «Տասը տարվա ընթացքում այդ ռեսուրսին այնպիսի վնաս ենք տվել, որ ստորգետնյա արտեզյան ջրերը մինչև 15 մետր իջել են: Հիմա միջոցառումներ ձեռնարկվում են, որոշ տեղերում մի փոքր ավելացել է: Բայց համալիր միջոցառումներ են պետք, հակառակ դեպքում մեր ջրային աղբյուրները կցամաքեն»:

Հաջորդ մտահոգիչ խնդիրը քաղաքաշինությունն է, որը բարձրացրել է էկոլոգիական ու սեյսմիկ ռիսկերը, Երևանում՝ հատկապես:

«Իջել է քաղաքների դիմակայությունը ջրհեղեղների ու այլ աղետների նկատմամբ: Այս խնդիրների մասին մենք ժամանակին շատ ենք խոսել, ցավոք մեր ձայնը լսելի չի եղել: Այս ամենի պատճառը հիմքը, մեր կարծիքով, էկոլոգիական մտածալեկերպի բացակայությունն է»,-ասաց նա: