Ձեր վստահելի աղբյուրը

Այսօր մեկնարկեց ԱԺ հինգերորդ գումարման տասնմեկերորդ նստաշրջանը: Նախքան օրակարգային հարցերին անցելը ԱԺ ՀԱԿ խմբակցության ղեկավար Լևոն Զուրաբյանը հայտարարեց, որ իրենց կուսակցության կարծիքով, առաջիկա ԱԺ խորհրդարանական ընտրությունների օրը՝ ապրիլի 2-ը նշանակելու հրամանագիրը հակասում է սահմանադրական մի քանի նորմերի:

«Մեր ուսումնասիրությունը ցույց է տալիս, որ ընտրությունները չէին կարող նշանակվել այդքան շուտ, քանի որ հակասում էր Սահմանադրությանը: Իշխանությունը, ի դեմս Դավիթ Հարությունյանի, ներկայացրել են հակափաստարկներ:  Մենք կարծում ենք՝ այն հիմքերը, որոնք առկա են, բավարար են, որ մենք դիմենք Սահմանադրական  դատարան,  թող  որոշի՝ ով է այս հարցում  ճիշտ»,- ասաց Լ. Զուրաբյանը:

Նա տեղեկացրեց, որ պատգամավոր Գագիկ Ջհանգիրյանի կողմից հեղինակվել է մի դիմում Սահմանադրական դատարանին, որն ուղղված է հենց այս հրամանագիրն անվարեր  ճանաչելուն:

Լ. Զուրաբյանը դիմեց  բոլոր քաղաքական ուժերին, պատգամավորներին,  ովքեր ցանկանում են, որ հենց սկզբից ԱԺ ընտրությունների  օրինականությունը կասկածի տակ չլինի, միանալ իրենց հայտին:

ՍԴ դիմելու համար անհրաժեշտ է 27 ստորագրության:

ԱԺ փոխնախագահ Հերմինե Նաղդալյանն ասաց, որ իրավաբանները, մասնագետները տվել են բացատրություններ այդ մասին:

«Հայաստանի նախագահ, ՀՀԿ ղեկավար Սերժ Սարգսյանը կարծիք է հայտնել այն մասին, որ սկզբունքային չի խնդիրը և քաղաքական ուժերի համաձայնության դեպքում մենք պատրաստակամ ենք օրը վերանայել»,- ասաց ԱԺ փոխնախագահը:

ԱԺ ԲՀԿ խմբակղության ղեկավար Նաիրա Զոհրաբյանն ասաց, որ իրենք կողմ են իրավական գործընթացներին, պաշտպանելու են սահմանադրագետների այն վեճը, որի արդյունքում կգան հստակ եզրակացության:

«Սակայն երբ որ փորձ է արվում խնդիրը տեղափոխել էմոցիոնալ դաշտ՝ ապրիլի 2, ուզում եմ հակառակ կողմից մոտենալ խնդրին: Իսկ միգուցե՞ ապրիլի 2-ին համախմբելով բոլոր ընդդիմադիր ուժերի կամքը, ներուժը, հաջողվի  անցկացնել ազատ, արդար ընտրություն, որպեսզի ձևավորվի այնպիսի իշխանություն, որը զինվորի հացը չի լափի, զինվորի փամփուշի փողը չի գողանա: Չեք կարծում արդյո՞ք,  որ դա կլինի ամենամեծ հարգանքի տուրքը ապրիլի 2-ին զոհված մեր երեխաների հիշատակի առջև»,-նշեց նա: