Դավիթ Բաբայան. Նման դեպքերը լինում են միայն Բաքվի կողմից

18:51 07/02/2017

Դավիթ Բաբայան. Նման դեպքերը լինում են միայն Բաքվի կողմից

Պարբերաբար նման դեպքեր լինում են ադրբեջանական կողմից: Սա առաջին դեպքը չէ և, կարծում եմ, ոչ էլ վերջինը: Պարզապես, ադրբեջանական կողմը տարբեր պատճառաբանությամբ ԵԱՀԿ առաքելությունը առաջապահ դիրքեր դուրս չի բերում: Անդրադառնալով Արցախի և Ադրբեջանի զինված ուժերի շփման գծում այսօր անցկացրած պլանային դիտարկման ժամանակ ադրբեջանական կողմի՝ ԵԱՀԿ առաքելությանը իր առաջապահ դիրքեր դուրս չբերելուն, «Panorama.am»-ի թղթակցի հետ զրույցում նշել է Արցախի հանրապետության նախագահի մամլո խոսնակ Դավիթ Բաբայանը:

Նշենք, որ այսօր ԵԱՀԿ առաքելության կողմից ԼՂՀ Հադրութի շրջանի ուղղությամբ անց է կացվել շփման գծի պլանային դիտարկում:

Բաբայանի խոսքով, ադրբեջանական կողմից հիմնականում նման քայլերը պայմանավորում են անվտանգության նկատառումներով:

«Նմանատիպ դեպքերը դժվարացնում են ԵԱՀԿ առաքելության աշխատանքները: Առաքելության դիտարկումները որևէ քաղաքական նշանակություն չունեն: Դրանք նպատակ ունեն ցույց տալու, թե ինչպիսին է իրավիճակը տվյալ պահին: Իսկ Ադրբեջանական կողմը նույնիսկ նման հարցերում դրսևորում է ապակառուցողական դիրքորոշում»,- նշեց Բաբայանն ու հավելեց, որ չի եղել մեկ դեպք, որ հայկական կողմի պատճառով առաքելությունը դուրս չգա դիտակետ, այդպիսի դեպքերը միշտ արձանագրվում են Բաքվի կողմից:

Բաբայանի խոսքով, հասկանալի է, որ խաղաղության և կայունության պահպանման տեսանկյունից կարևորագույն ուղղություններից է հետաքննության մեխանզիմների ներդրումը: Իսկ եթե այս պայմաններում պարբերաբար խախտումներ են անում այսպիսի տեխնիկական հարցերում՝ դրսևորելով իրենց ապակառուցողական մոտեցումները, ապա ի՞նչ կարելի է ակնկալել կարևոր խնդիրների քննարկումից:

«Այսինքն սա ևս մեկ անգամ ցույց է տալիս, որ մենք գործ ունենք ոչ ադեկվատ հարևանի հետ, որից կարելի է ամեն ինչ սպասել»,- նշեց նա:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: