Ձեր վստահելի աղբյուրը

ՀՀ առողջապահության նախարարությունը ոչ վարակիչ հիվանդությունների վաղ հայտնաբերմանն ու վերահսկմանն ուղղված ծրագրերի շրջանակում 2016 թվականի  սեպտեմբերից դեկտեմբերն ընկած ժամանակահատվածում  իրականացրել է շագանակագեղձի քաղցկեղի վաղ հայտնաբերման սկրինինգ:

Այսօր լրագրողների հետ հանդիպման ժամանակ ՀՀ առողջապահության նախարարության բժշկական օգնության քաղաքականության վարչության պետ Ծաղիկ Վարդանյանը ներկայացնելով  իրականացված հետազոտության արդյունքները՝ նշեց, որ սկրինինգն իրականացվել է սոցփաթեթի շահառուների շրջանում:

Ծրագրի շրջանակներում 40-ից 70 տարեկան արական սեռի 2183 անձ անցել է շագանակագեղձի քաղցկեղի ախտորոշման սկրինինգ: Սկրինինգի ընթացքում իրականացված հետազոտությունների արդյունքում 2183 արական սեռի անձից 1248-ը (57,2%) համարվել է շագանակագեղձի քաղցկեղի ցածր ռիսկի խումբ, իսկ 935-ը (42,8%) շագանակագեղձի քաղցկեղի բարձր ռիսկի խմբում է, որոնցից 585-ին (62,6%) ցուցված է շարունակական հսկողություն և կրկնակի հետազոտության իրականացում յուրաքանչյուր տարին մեկ անգամ, իսկ 350-ի (37,2%) մոտ հայտաբերվել են տարբեր շեղումներ: Իրականացված հետազոտությունների արդյունքում 4 պացիենտի մոտ հայտնաբերվել է շագանակագեղձի մետաստատիկ քաղցկեղ:

Հայտնաբերվել են նաև միզասեռական համակարգի այլ ուռուցքային հիվանդություններ: Այսպես` 23 պացիենտի մոտ (2,5%) հայտնաբերվել է միզապարկի նորագոյացություն, 1-ի մոտ` միզածորանի նորագոյացություն, 1-ի մոտ` երիկամի նորագոյացություն:

Պետության կողմից երաշխավորված անվճար բժշկական օգնության և սպասարկման շրջանակներում կազմակերպվել է ուրոլոգի խորհրդատվություն, պրոստատ սպեցիֆիկ հակածնի հետազոտություն, ներքին օրգանների սոնոգրաֆիա, մեզի ընդհանուր քննություն, ուրոֆլոումետրիա:

Ծաղիկ Վարդանյանը նշեց, որ այսօր շատ ավելի շեշտադրվում է  կանանց առողջությունը, բայց տղամարդիկ նույնպես հետազոտման և ուշադրության կարիք ունեն: Ուստի, ըստ նրա, որոշում կայացվեց թիրախային խմբում իրականացնել սկրինինգային հետազոտություն: «Արդյունքում պարզվեց, որ հետազոտված ամեն երկրորդ տղամարդ խնդիր ունի»,- ասաց նա՝ հավելելով, որ առաջին սկրինինգային ծրագրի վերլուծությունը ցույց է տալիս, որ ծրագիրը պետք է շարունակական լինի, բացի այդ, այն պետք է ընդլայնել՝ ընդգրկելով մարզերը: Նշենք, որ այս հետազոտությունն անցկացվել է Երևանում: 

Ծաղիկ Վարդանյանը հայտնեց, որ սոցփաթեթի շահառուների շրջանում իրականացրել են վերլուծություն: Արդյունքում, ըստ նրա, ընդհանուր հիվանդությունների ցանկում  2,8 տոկոսը կազմել են շագանակագեղձի հետ կապված խնդիրները: «Դա մեզ անհանգստացրեց, քանի որ սոցփաթեթի շահառուները հիմնականում երիտասարդներ են, ռիսկային խմբում ընդգրկվծ չեն: Եւ եկանք այն եզրակացության, որ եթե այս տարիքային խմբում է նման տարածվածություն, ուրեմն թիրախային խմբում այն ավելի բարձր կլինի: Դրա համար նախարարությունը սկրինինգային հետազոտություն անցկացնելու որոշում կայացրեց»,- նշեց վարչության պետը: 

Ուրոլոգ Հրաչիկ Պետրոսյանն էլ ասաց, որ այս հետազոտության արդյունքները չափազանց մտահոգիչ են,քանի որ ստացվում է՝ ամեն երկրորդ տղամարդ գտնվում է բարձր ռիսկի խմբի մեջ: «Դա նշանակում է, որ հետագա տարիներին այդ տղամարդկանց մոտ կարող է զարգանալ շագանակագեղձի քաղցկեղ: Այսինքն՝ տարեկան մեկ անգամ նրանք պետք է հետազոտվեն»,- նշեց ուրոլոգը: 

Հրաչիկ Պետրոսյանը նշեց նաև, որ տղամարդկանց շրջանում ամենատարածված օնկոլոգիական հիվանդություններից  մեկը շագանակագեղձի  քաղցկեղն է: Հիվանդության սկզբնական փուլերում նախանշաններն ու անհանգստությունները համարյա աննկատ են: Հենց սա է պատճառը, որ հիվանդությունն ամբողջ աշխարհում հայտնաբերվում է ավելի ուշ փուլերում: Ուստի, ըստ նրա, որքան վաղ է հայտնաբերվում  քաղցկեղը, այնքան ավելի մեծ է լիարժեք ապաքինման հնարավորությունը:

Ըստ մասնագետի՝ այն հանդիպում է 40 տարեկանից հետո: Քաղցկեղի պատճառները բազմաթիվ են: Ռիսկի գործոններից են` տարիքը, ժառանգականությունը, ծխախոտը, գիրությունը: Ուշադրության արժանի է հատկապես ընտանեկան պատմությունը, որի ժամանակ ռիսկային գործոնը կրկնապատկվում է: