Ձեր վստահելի աղբյուրը

Խորհրդարանական ընտրությունների օրը տեղափոխելու վեարաբերալ Սահմանադրական դատարան դիմելու ՀԱԿ նախաձեռնությանը միացել է 16 պատգամավոր:

«Ունենք 16 ստորագրություն:  Կան պատգամավորներ, ովքեր ասել են, որ  կստորագրեն, այս պահն դահլիճում չեն: Կարևորն այն է, որ ժամկետի սահմանափակում չկա: Կսպասենք մինչև քառօրյայի վերջը: Հուսանք անհրաժեշտ 27 ստորագրությունը կհավաքվի»,- Ազգային ժողովում լրագրողների հետ զրույցում ասաց ԱԺ ՀԱԿ խմբակցության քարտուղար Արամ Մանուկյանը:

Նրա կարծիքով, այն պատգամավորները, ովքեր չեն ստորագրի, կդժվարանան պատասխանել հարցին, թե ինչո՞ւ չեն ստորագրել:

«Մենք ներկայացրել ենք իրավաբանական փաստաթուղթ,  ներկայացված հիմնավորումներն առավել քան համոզիչ են, որ կա սահմանադրական  խախտում:  Մենք մանրամասն, գիտականորեն հիմնավորել ենք խախտումների ակնհայտությունը, որ դրանից հետո եթե պատգամավորները չստորագրեն, հարց տվեք՝ եթե կա ակնհայտ սահմանադրական խախտում, համաձա՞յն են, որ առաջիկա ընտրություններն անցկացվեն սահմանադրական խախտումներով: Հենց այդ հարցին էլ կդժվարանան պատասխանել»,- ասաց Ա. Մանուկյանը:

Նա նշեց, որ ընտրությունների օրը տեղափոխելը, իհարկե, նաև էմոցիոնալ ֆոն ունի՝ կապված ապրիլյան պատերազմի հետ, սակայն իրենք Սահմանադրական դատարանին դիմում են միայն իրավական հիմքերով: