Ձեր վստահելի աղբյուրը

«Որոշ պաշտոնյաներ, մարզպետեր իրենց նոմինալ գինն ու ինքնարժեքը բարձրացնելու համար անցել են սպառնալիքների, ահաբեկումների իրենց հոգեհարազատ ժանրին»,- Ազգային ժողովում հայտարարություններին ժամին ասաց ԲՀԿ խմբակցության ղեկավար Նաիրա Զոհրաբյանը:

Նա ասաց, որ ոմն մարզպետ հրավիրում է  ԲՀԿ գյուղապետերի, փորձում սպառնալ՝  հայտարարելով, թե մարզում մառոզ անողը  ինքն է:

«Իհարկե, մառոզի լավագույն մասնագետը մեր երկրում Հիդրոմետ ծառայության պետ  Գագիկ Սուրենյանն է, որի մոտ  մառոզ անող այդ մարզպետը  կարող է հաստիքային գործի անցնել ու կախված աշխատավարձի  չափից  որոշեն՝ մառոզ է անում, ցունամի, թե ընդամենը քամի է տատանում»,- նշեց պատգամավորը:

Ն. Զոհրաբյանի խոսքով, ժամանակն է հասկանալու, որ ահաբեկումը, սպառնալիքը, անձնագրի պատճե հավաքելը, գործից հանելը, գործ տալը  չեն դառնում քվե  ու չեն դառնալու. «Քվե դառնում է հեղինակությունը, աշխատանքը, քվե դառնում է ժողովրդի հավատն ու վստահությունը»:

«Խորհուրդս բարի է՝ քաշից ավելի պարտավորություն մի վերցրեք, քաղաքական գրիժան անբուժելի է: Պետք է լրջորեն գնահատել խորհրդարանական ընտրությունների  կարևորությունը Հայաստանի ապագայի համար և չփորձել հին ու բարի ժանգլորությամբ  քվե սարքել: Չի ստացվելու»,- ասաց Նաիրա Զոհրաբյանը: