Ձեր վստահելի աղբյուրը

Երևանի օլիմպիական հերթափոխի քոլեջում ավարտված ծանրամարտի Հայաստանի տղամարդկանց առաջնության անդորրն այս տարի խախտվեց միջադեպով, որն ավելի շատ քննարկումների տեղիք տվեց, քան բուն մրցաշարը: Կատարվածի և «Հայաստանի 2017 թ. առաջնության արդյունքների մասին այսօր լրագրողների հետ հանդիպման ժամանակ խոսեց ծանրամարտի Հայաստանի տղամարդկանց հավաքականի գլխավոր մարզիչ Փաշիկ Ալավերդյանը:

Հիշեցնենք, որ 94 կգ քաշային կարգում հանդես եկող Աղասի Աղասյանը, առաջնության ժամանակ կատարելով իր բոլոր 6 մոտեցումները, երկարամարտի 344 կգ արդյունքով դարձել էր փոխչեմպիոն, հետո հանել խաղակոշիկները, թողել դրանք մրցահարթակի վրա՝ այս կերպ ցույց տալով իր բողոքն ու միաժամանակ ակնարկելով մարզական կարիերան ավարտելու մասին, հետո էլ չէր ներկայացել պարգևատրման արարողությանը: Ավելի ուշ Աղասյանն իր ֆեյսբուքյան էջում գրառում էր կատարել՝ նշելով, որ որոշ մարդիկ իր խաղակոշիկներից ավելի էժան արժեն:

Անդրադառնալով այս թեմային՝ Փաշիկ Ալավերդյանը շեշտեց, որ մրցաշարերի ժամանակ միշտ էլ լինում են դժգոհող մարզիկներ, սակայն Աղասյանը չափն անցել է՝ իրեն տրված հնարավորությունը ճիշտ օգտագործելու և իր լավագույն կարգն ապացուցելու փոխարեն Օլիմպիական խաղերին չմասնակցելու թեման շարունակելով: 

«Կան մարզիկներ, ովքեր իրենց անհաջողությունները ցանկանում են գցել ուրիշների վրա: Աղասի Աղասյանը հայտ էր ներկայացրել, որպեսզի մասնակցեր 85 կգ քաշայինների պայքարին: Մրցումից 2 ժամ առաջ մարզիկներին մեկ ժամ է տրվում կշռման արարողությանը մասնակցելու համար, մյուս մեկ ժամը նրանք հանսգտանում են: Աղասյանը 85 կգ քաշային կարգին չէր համապատասխանում, ծանր էր 400 գրամով: Փորձեց ինձ համոզել, որպեսզի մասնակցի ոչ թե 94 կգ, այլ 85 կգ քաշայինների պայքարին:

Գիտեք, երբ որ ես արտասահմանում լինում եմ մրցավարական կոլեգիայի կազմում, այնտեղ ինչ-որ ձևով աշխատում եմ օգնել հայ մարզիկներին, թեև դրա իրավունքը չունեմ: Այսինքն կարող եմ վատություն անել հակառակորդին, տվյալ դեպքում՝ այլ երկրների ներկայացուցիչներին: Այս հայտարարությունից հետո ինձ կարող են Եվրոպայի ֆեդերացիայից հեռացնել: Աղասյանը խնդրում էր, որ իր քաշն ավել լինի, բայց մասնակցի 85 կգ քաշայինների պայքարին: Հայաստանում ես ինձ նման բան թույլ չէի տա: Ուզում էր, որ իր կողքին կանգնած հայ պատանուն և երիտասարդին երկուսով խաբեինք: Ես չգնացի այդ խաբեությանը»,- պատմեց Ալավերդյանը:

Մարզչի խոսքերով՝ սա առիթ է ծառայել, որպեսզի Աղասյանը նեղանա իրենցից: Գնացել է տուն, որից հետո Ալավերդյանի խնդրանքով Աղասյանի գլխավոր մարզիչ Երվանդ Կիրակոսյանը համոզել է, որ գա ու մասնակցի 94 կգ քաշայինների պայքարին:

«Կրկին խախտում կատարեցի՝ միջազգային կանոնակարգի խիստ խախտում: Եթե մարզիկը չի կշռվում իրեն հայտ ներկայացրած քաշային կարգում, իրավունք չունի մասնակցելու վերոհիշյալ մրցումներին և ոչ մի քաշային կարգում: Հասկանալով ծանրորդի կատարած աշխատանքը և այն, որ հիմա էլ լավ մարզավիճակում է, ընդառաջեցի: Նա պետք է ցույց տար իր հնարավորությունները: Մոտեցումների ժամանակ, երբ զգաց, որ չի կարող հաղթել և Կարուշ Ղուկասյանն իրենից մի քանի գլուխ բարձր է, սկսեց դերասանական խաղ տանել, որն ընդունելի ու հաճելի է հանդիսականին, սակայն հետո եղավ այն, ինչ եղավ: Ծանրաձողը երկար ժամանակ պահեց գլխավերևում, փորձելով ապացուցել, որ ինքն ամենակարող է, հետո մարզակոշիկները թողեց, չներկայացավ պարգևատրման արարողությանը»,- ասաց Ալավերդյանը:

Փաշիկ Ալավերդյանին վրդովվել էր այն հանգամանքը, որ նա որոշ մարդկանց իր խաղակոշիկներից էժան էր գնահատել՝ նկատի ունենալով հենց իրեն: Այն մարդուն, ով տարիներ շարունակ իրեն ձեռք է մեկնել: Հետո էլ հայտարարել էր, թե Փաշիկ Ալավերդյանին չի ճանաչում: 

«Ձայն եմ տալիս՝ վերադարձիր, 20,000 դրամ պարգևավճարն առավ ու գնաց՝ արհամարհելով մեդալը: Ես էլ փոքր ժամանակ տրեխներ եմ հագել, ուրեմն ինքն էլ իմ տրեխների արժեքը չունի»,- նշեց մարզիչը:

Անդրադառնալով այն թեմային, թե ինչո՞ւ Աղասյանը չի մասնակցել Ռիոյի Օլիմպիական խաղերին, Փաշիկ Ալավերդյանը հայտարարեց, որ Աղասին այնքան անպատասխանատու է, որ ոչ միայն կխանգարեր ինքն իրեն, այլ հավաքականի մյուս տղաներին: Այն ժամանակ, երբ նա իմացել է, որ իր փոխարեն Ռիո պետք է մեկնի Առաքել Միրզոյանը, սկսել է խանգարել բոլորին, իսկ Օլիմպիադայի ժամանակ ճնշումն արդեն հոգեբանական բնույթ է կրել:

«Օլիմպիական խաղերում պետք է ներկայացնես ազգ, պետություն, ֆեդերացիա, իսկ նա կարող էր մեծ անակնկալ մատուցել, ուստի չվստահեցինք նրան: Դրանից հետո Աբովյանում ուսումնամարզական հավաքի էինք: Աղասին, համոզելով մյուս տղաներին, կիզիչ շոգին, ողջ թիմին բերել էր, որ խանգարեն մեր աշխատանքը: Այսինքն նա վտանգավոր է ոչ միայն իր՝ այլև մյուսների համար: Դա այն արարքն էր, ինչի պատճառով Օլիմպիադայի յուրաքանչյուր մասնակցից պակասեց 5-ական կիլոգրամ»,- ասաց Ալավերդյանը:

Panorama.am-ի այն հարցին, որ Փաշիկ Ալավերդյանն իր հարցազրույցներում բազմաթիվ անգամներ նշել է, որ արգելված խթանիչներ օգտագործած հայ մարզիկներին պետք չէ ազգի թշնամի դարձնել, քանի որ նրանք մերն են, սակայն հիմա Աղասին նույն կարգավիճակում է հայտնվել և հնարավոր չէ՞ նրան դարձի բերել, պատասխանեց.

«Աղասի Աղասյանն ազգի թշնամի չէ, այլ ծանրամարտի հավաքականի թշնամին է: Ես ուղղիչ աշխատանքային գաղութի պետ չեմ, այլ մանկավարժ եմ: 18 տարի է, գիտեմ այս տղային»:

Փաշիկ Ալավերդյանի խոսքերով՝ Աղասյանի ազդեցությունն էր, որ Ռուբեն Ալեքսանյանը 254 կգ հրում չկատարեց այն դեպքում, երբ մարզումների ժամանակ 260-270 կգ էր հրում, չկարողացավ, որովհետև ֆիզիկական ֆունկցիոնալությունն իջել էր, քանի որ ամռան կեսին օրերով Երևանում էր: Անդրանիկ Կարապետյանի վնասվածքի պատճառն էլ Աղասյանն էր: Դեռ լավ է, որ հավաքականը պատվով ելույթ ունեցավ Օլիմպիական խաղերում, թեև շատ ավելի լավ կլիներ, որ հինգ մասնակիցներից հինգն էլ չեմպիոն դառնային: