Ձեր վստահելի աղբյուրը

Բելառուսի ներքին գործերի նախարարության քաղաքացիության և միգրացիայի հարցերով վարչության ղեկավար Ալեքսեյ Բեգունը հայտարարել է, որ բլոգեր Ալեքսանդր Լապշինը հավելյալ պաշտպանության հայտ չի ներկայացրել: Այս մասին հայտնում է «ՌԻԱ Նովոստի» գործակալությունը: 

«Մենք այդպիսի հայց չենք ստացել», - հայտարարել է Բեգունը:

Նշենք, որ Ռուսաստանի և Իսրայելի քաղաքացի բլոգեր Ալեքսանդր Լապշինի  արտահանձնման մասին որոշումն ուժի մեջ թողնելու Գերագույն դատարանի որոշումից հետո հաղորդվում էր, որ արտահանձնման սպասող Լապշինը դեռ չի տեղափոխվի Ադրբեջան՝ այն պատճառով, որ նրա կինը պաշտոնապես դիմել է բելառուսական իշխանություններին նրան լրացուցիչ պաշտպանություն տրամադրելու խնդրանքով: Ավելի վաղ հաղորդվել է, որ Լապշինը երեքշաբթի հատուկ չվերթով Մինսկից տեղափոխվել է Բաքու:

Բլոգերը ձերբակալվել է անցած տարվա դեկտեմբերի 15-ին Մինսկում՝ Ադրբեջանի դիմումի համաձայն, որտեղ նրա նկատմամբ միջազգային հետախուզում է հայտարարվել: Լապշինին ներկայացված մեղադրանքների համար նրան հասնում է 5-8 տարվա ազատազրկում: