Ձեր վստահելի աղբյուրը

«Ադրբեջանն առաջին հերթին գնում է նման քայլերի, որպեսզի Լեռնային Ղարաբաղի Հանրապետություն ավելի քիչ մարդիկ գնան»,- Ազգային ժողովում կառավարության հետ հարց ու պատասխանի ժամանակ ասաց ՀՀ արտաքի գործերի նախարար Էդվարդ Նալբանդյանը՝ պատասխանելով պատգամավոր Ռուբիկ Հակոբյանի՝ Բելառուսի կողմից բլոգեր Ա. Լապշինին Ադրբեջանին արտահանձնելու վերաբերյալ հարցին:

Նրա խոսքով, Ադրբեջանի սև ցուցակը չի կանգնեցրել տասնյակ երկրների հարյուրավոր հեղինակավոր, ականավոր դեմքերի, պետական այրերի այցել Արցախ:

«Ավելացել են այցելուները, շարունակում են աճել»,- ասաց նախարարը:

Է. Նալբանդյանը նաև նշեց, որ միգուցե Ադրբեջանն այսպես փորձում է այլոց ներքաշելով այսպիսի գործարքի մեջ՝  այլ ուղղություններով վնասներ հասցնել:

«Ադրբեջանի նյարդերը տեղի են տվել, հավասարակշռությունից դուրս է եկել և փորձում է այլոց հավասարակշռությունից հանել: Մենք պետք է չտրվենք դրան, և Ադրբեջանի  ջաղացին  ջուր չլցնենք»,- ասաց ՀՀ ԱԳ նախարարը: