Ձեր վստահելի աղբյուրը

Կենտրոնական ընտրական հանձաժողովն այսօր էլ որևէ քաղաքական ուժից կամ միավորումից ընտրացուցակների գրանցման համար անհրաժեշտ փաստաթղթեր չի ստացել: Panorama.am-ին հայտնեց ԿԸՀ մամուլի քարտուղար Հերմինե Հարությունյանը:

Ե՞րբ են պատրաստվում հրապարակել ցուցակներն ընտրություններին մասնակցելու մասին հայտարարած քաղաքական ուժերը: Panorama.am-ը փորձել է պարզել, թե ինչ փուլում են դրանց կազմման աշխատանքները:

«Ազատ դեմոկրատներ» կուսակցության փոխնախագահ Անժելա Խաչատրյանը ասաց. «Ցուցակները սահմանված ժամկետում կներկայցնենք ԿԸՀ: Այս պահին տարածքային և համամասնական ցուցակների կազմման աշխատանքներ են իրականացվում, նախընտրական շրջանին ենք պատրաստվում։ Իսկ վերջնական ցուցակը բնականաբար պետք է քննարկվի և հաստատվի վարչության ընդլայնված նիստում: Այս շաբաթվա վերջ, կարծում եմ, կհրապարակվի»:

«Քաղաքացիական պայմանագիր» կուսակցության վարչության փոխնախագահ Սուրեն Պապիկյանը հայտնեց, այս պահին հստակ չի կարող ասել, թե որ օրը կհրապարակեն  ցուցակները:

«Ժամանակ շատ քիչ է մնացել, մենք, իհարկե, կհասցնենք մինչև փետրվարի 16-ը դիմել: Կարծում եմ, մեկ շաբաթվա ընացքում այդ ամենը կլինի»,-ասաց «Ելք» դաշինքի ներկայացուցիչը, ավելացնելով, որ իրենց ցուցակը դեռ կազմավորման փուլում է:

Այս պահին դաշինքի հետ բանակցություններ է վարում «Ժառանգություն» կուսակցությունը:
«Բանակցությունները շարունակվում են: Եթե ընդհանուր եզրեր գտնենք, կհամագործակցենք, եթե ոչ՝ կգնանք երեք քաղաքական ուժերով: Առաջիկա օրերին  մինչ փաստաթղթերը հանձնելը, մեր դռները փակ չեն»,-ասաց նա:
Հիշեցնենք, այս դաշինքի կազմում են «Լուսավոր Հայաստան», «Քաղաքացիական պայմանագիր», «Հանրապետություն» կուսակցությունները:

Հայաստանի Հանրապետական կուսակցության կազմակերպչական հանձնաժողովի նախագահ Ռուբեն Թադևոսյանը Panorama.am-ին ասաց, որ իրենց ցուցակը կհրապարակեն կուսակցության գործադիր մարմնի որոշումից հետո:

«Այս պահին հստակ բան ասել չեմ կարող: Կլինի գործադիր մարմնի քննարկումը և որոշումը, այդ ժամանակ կհրապարակենք»,-ասաց նա:
Հիշեցնենք, որ ՀՀԿ գործադիր մարմնի նիստերն անցկացում են հինգշաբթի երեկոյան:

Հաջորդ ուրբաթ օրը՝  փետրվարի 10-ին Կարեն Դեմիրճյանի անվան  մարզահամերգային համալիրում կանցկացվի «Բարգավաճ Հայաստան» կուսակցության 9-րդ համագումարը: Ենթադրվում է, որ միջոցառման ընթացքում մի շարք հարցերի պատասխաններ կտրվեն:
Ծառուկյանին շուրջ միավորվելու մասին հայտարարել էր Լյուդմիլա Սարգսյանը, «Առաքելություն» կուսակցությունը, «Միասնություն» շարժումը:

Համախմբում կուսակցության վարչության անդամ, կուսակցության մամուլի խոսնակ Արեգնազ Մանուկյանն ասաց, որ «Օհանյան-Օսկանյան» դաշինքում  ցուցակների հարցը դեռ չենք քննարկում, քանի որ այս պահին աշխատանքներ են ընթանում դաշինքի ծրագրային դրույթների և դաշինքի ընդլայնման հարցով նաև այլ քաղաքական ուժերի, հասարակական միավորումների և անհատների հետ։

«Երբ դաշինքը ամբողջական ձևավորված լինի, այդ ժամանակ էլ կանդրադառնանք մնացած տեխնիկական և երկրորդական հարցերին։ Բնականաբար, մեր թեկնածուների անունները ԿԸՀ կներկայացնենք օրենքով սահմանված ժամկտեների սահմաններում»,-ասաց նա:

Ա. Մանուկյանը հրաժարվեց անուններ նշել, թե այս պահին քաղաքական ինչ ուժերի հետ են քննարկումներ ընթանում. «Քանի որ երկուստեք նման պայմանավորվածություն ունենք և էթիկապես էլ ճիշտ չի լինի բարձրաձայնելը։ Երբ վերջնական համաձայնության գանք, այդ ժամանակ էլ կհրապարակենք»:

Օսկանյան-Օհանյան անունը ոչ պաշտոնապես ստացած դաշինքի կազմում այս պահին ընդգրկված են «Համախմբում» կուսակցությունը՝ նախկին ԱԳ նախարար Օսկանյանի գլխավորությամբ, պաշտպանության նախկին նախարար Սեյրան Օհանյանը,  ՀՀ աշխատակազմի ղեկավարի նախկին տեղակալ Վիկտոր Դալլաքյանը, ԱԻՄ-ը, Հայաստանի Դեմոկրատական կուսակցությունը:

Հիշեցնենք, որ կուսակցություններն ու դաշինքները ընտրական ցուցակների  գրանցման փաստաթղթերը պետք է ներկայացնեն ԿԸՀ փետրվարի 6-16-ը ժամը 18:00-ն ներառյալ: Ընտրական ցուցակների գրանցումը կատարվում է փետրվարի 16-26-ը:  Նախընտրական քարոզչությունը մեկնարկում է մարտի 5-ին և կավարտվի մարտի 31-ի ժամը 18:00-ին: