Ձեր վստահելի աղբյուրը

«Ադրբեջանը հետևողականորեն հետապնդում է իրավապաշտպաններին, լրատվամիջոցների ներկայացուցիչներին, որոնք այցելում են Արցախ: Սա իհարկե ընդունելի մոտեցում չէ»:

Panorama.am-ի հետ զրույցում, անդրադառնալով Մինսկում ձերբակալված բլոգեր Ալեքսանդր Լապշինին Ադրբեջանին արտահանձնելուն, ասաց  Երևանի մամուլի ակումբի նախագահ Բորիս Նավասարդյանը:

Երևանի մամուլի ակումբի ղեկավարին այս պատմության մեջ առավել շատ մտահոգել են Բելառուսի իշխանությունների գործողությունները:

«Նրանք մի քանի առումներով միջազգային ընդունված նորմերի խախտումներ են թույլ տվել: Առաջին հերթին փաստորեն աջակցել են Ադրբեջանին, որպեսզի քրեական պատասխանտվության ենթարկվի երրորդ երկրների քաղաքացին: Լապշինը ոչ Ադրբեջանի, ոչ էլ Բելառուսի քաղաքացի է: Երկրորդը՝ շատ լավ իմանալով, որ Ադրբեջանում խնդիրներ կան ձերբակալված անձանց իրավունքների հետ, դրա բազմաթիվ ապացույցները մենք ունենք, արտահանձնեց Լապշինին: Միջազգային նորմերն ասում են, որ այդ երկրներին արտահանձնումն ընդունված չէ՝  անկախ այն բանից, թե ինչ ծանրության պատիժ է սպասվում»,-ասաց Բորիս Նավասադյանը:

Նա ընդգծեց՝ Լապշինին առաջադրված մեղադրանքը որևէ դեպքում ծանր համարել չի կարելի, նույնիսկ միջազգային իրավունքի տեսակետից:

Նավասարդյանի խոսքով, իրենք այս ընթացքում աշխատել են ադրբեջանցի ու բելառուս գործընկերների հետ, որպեսզի բլոգերի հարցը բարձրացնեն իշխանությունների առաջ:
«Ցավոք, մենք շատ լավ գիտենք, թե Ադրբեջանում լրատամիջոցներն ինչ վիճակում են, և դժվար էր ակնկալել, որ նրանք ձայն կբարձրացնեն այդ հարցի շուրջ: Բայց Բելառուսում մեզ հաջողվեց հասնել նրան, որ քաղհասարակության ներկայացուցիչները դիմեն իշխանություններին, որպեսզի արտահանձնման քայլին չգնան: Բայց քանի որ մենք գիտենք ամբողջ քաղաքական ենթատեքստը, այդ ջանքներն արդյունք չտվեցին: Մենք այս ընթացքում կապի մեջ էինք նաև միջազգային իրավապաշտպան կազմակերպությունների հետ»,-ասաց նա:

Այսօր Արցախի մարդու իրավունքների պաշտպան Ռուբեն Մելիքյանը հայտարարեց, որ Լապշինի գործը դառնալու է հակադարձ նախադեպ: Նա հայկական իրավապաշտպան ու լրագրողական համայնքներին կոչ արեց ներգրավվել Լապշինի գործը հակադարձ նախադեպ դարձնելու գործընթացին:

Նավասարդյանից հետաքրքվեցինք, ինքն ու իր ղեկավարած կազմակերպությունը պատրաստվո՞ւմ են ներգրավել այդ աշխատանքներում:

«Մենք միշտ էլ աշխատել ենք այդ ուղղությամբ: Միշտ էլ բարձրաձայնել ենք, որ չի կարելի չճանաչված հանրապետություններին մեկուսացնել: Մեկուսացումը միայն խորացնում է խնդիրը և որևէ կերպ չի կարող նպաստել հակամարտությունների խաղաղ լուծմանը: Մենք միշտ զբաղվել ենք և զբաղվելու ենք նրանով, որ Լեռնային Ղարաբաղի քաղհասարակության ներկայացուցիչները հնարավորինս ներգրաված լինեն տարբեր ձևաչափերում, մասնավորապես շարունակաբար բարձրացվում է հարցը, որ իրենք հնարավորություն ունենան ներկայացված լինելու Արևելյան գործընկերության քաղաքացիական հասարակության ֆորումի աշխատանքներում»,-ասաց նա:

Նավասարդյանը կարևորեց մեծ թվով լրագրողների այցելությունը Լեռնային Ղարաբաղ, քանի որ հասարակությունը իրավունք ու պահանջ ունի իմանալ՝ թե ինչ է կատարվում այնտեղ:

«Մասնավանդ շատ են հարցեր բարձրացվում միջազգային պաշտոնական տարբեր ատյաններում՝  իբրմարդու իրավունքների հետ խնդիրներ կան: Անկախ այն բանից, թե որքանով են իրական այդ խնդիրները, պետք է դրանց օբյեկտիվ գնահատական տալ, իսկ առանց Արցախ այցելելու այդ գնահատականները, որոշումները չեն կարող ազդեցիկ ու օգտակար լինել»,-ասաց Երևանի մամուլի ակումբի նախագահը:

Նավասարդյանը գործընկերների հետ նաև մի փոքր ուսումնասիրել է, թե որքանով է հնարավոր ԼՂ այցելած հայաստանցի ակտիվիստի կամ լրագրողի նկատմամբ նման գործողությունների իրականացումը:

«Ըստ մեր տվյալների, կարծես թե նման վտանգ չկա, թեև 100 տոկոս համոզված հնարավոր չէ լինել: Գուցե երկու ամիս առաջ մենք Լապշինի գործի վերաբերյալ  հանգիստ զգայինք, բայց փաստորեն այդ վերաբերմունքը արդարացված չէր լինի»,-ասաց նա:

Հիշեցնենք, որ Իսրայելի և Ռուսաստանի քաղաքացի համարվող Լապշինը ձերբակալվել է Մինսկում Ադրբեջանի խնդրանքով: Լապշինն Արցախ այցելելու համար ընդգրկված է  եղել Ադրբեջանի սև ցուցակում, սակայն 2015-ի հունիսին Վրաստանի տարածքով ուկրաինական անձնագրով Լապշինը մուտք է գործել Ադրբեջան: Դրանից հետո Ադրբեջանը միջազգային հետախուզում է հայտարարել բլոգերին՝ «Պետական սահմանների մասին» ու միգրացիոն  օրենքները խախտելու մեղադրանքով: Նրան անցած գիշեր Բելառուսը արտահանձնեց Ադրբեջանին: