Ձեր վստահելի աղբյուրը

«Սա  այն սովորական դեպքը չէ, որ մենք պետք է բավարարվենք միայն այստեղ կամ այնտեղ այդ մասին խոսելով: Ազգային ժողովը որպես թիվ մեկ քաղաքական մարմին, այս հարցի հետ կապված պետք է իր դիրքորոշումը հայտնի»,- Ազգային ժողովում նիստի ժամանակ հայտարարեց պատգամավոր Խաչատուր Քոքոբելյանը՝  խոսելով Բելառուսի կողմից ռուս բլոգեր Ա. Լապշինին Ադրբեջանին արտահանձնելու մասին:

Պատգամավոր Նիկոլ Փաշինյանը հայտարարեց, որ Բելառուսի այս քայլն իր քաղաքական նշանակությամբ համարժեք է Հունգարիայի կողմից Ռամիլ Սաֆարովին Ադրբեջանին արտահանձնելուն: Նա կոչ արեց այս իրավիճակով մտահոգ բոլոր քաղաքացիներին ժամը 15:00-ին լինել ՀՀ-ում Բելառուսի դեսպանության դիմաց՝  արտահայտելու  կոշտ դիրքորոշում այս հարցի վերաբերյալ:

«Կարծում եմ՝ ՀՀ ԱԳՆ-ն պետք է հետ կանչի Բելառուսում Հայաստանի դեսպանին, ձեռնարկի դիվանագիտական, քաղաքական ամենակոշտ հակազդեցության միջոցները»,- ասաց նա:

«Ժառանգություն» խմբակցության անդամ Թևան Պողոսյանը նշեց, որ ինստիտուցիոնալ մոտեցում պետք է ցուցաբերել,  առաջարկեց արտահերթ լսումներ կազմակերպել, հրավիրել ԱԳ, պաշտպանության նախարարներին և համապատասխան ինստիտուտների ներկայացուցիչներին՝ մի խումբ հարցեր քննարկելու համար:

«Հանրապետական» խմբակցության ղեկավար Վահրամ Բաղդասարյանն ասաց, որ սա առաջին դեպքը չէ, երբ Բելառուսի կողմից Ադրբեջանի նկատմամբ կողմնակալ վերաբերմունք է նկատվում:
«Սա մարդու իրավունքների ոտնահարում է: Մենք չպիտի հարց բարձրացնենք, որ Հայաստանը դադարեցի ՀԱՊԿ անդամակցությունը, այլ հարց բարձրացնենք, որ Բելառուսը դադարեցնի անդամակցությունը ՀԱՊԿ-ին»,- նշեց նա:

ՀՅԴ խմբակցության անդամ Աղվան Վարդանյանն ևս առաջարկ արեց. «Գործնական կլինի,  որ Ազգային ժողովը հանդես գա հայտարարությամբ: Հանձնարարենք արտաքին հարաբերությունների հանձնաժողովին մշակել հայտարարության տեքստ, որը վաղը կքվեարկենք»:

ԱԺ պատգամավոր, «Եվրոպական Ինտեգրացիա» ՀԿ նախագահ Կարեն Բեքարյանի խոսքով, Ադրբեջանի նպատակը Լապշինը չէ, այլ դրդել Հայաստանին քայլերի, որոնք թշնամանքի կբերեն ինչ-որ երկրների կամ կառույցների հետ:

«Գործողությունները պլանավորելիս պետք է սա աչքի առաջ ունենանք»,- նշեց նա: