Ձեր վստահելի աղբյուրը

«Այո, սահմանադրության մեջ առկա է անհամապատասխանություն, երկու հոդվածեր՝ 89-րդ և 209-րդ միմյանց չեն համապատասախանում»,- Ազգային ժողովում կառավարության հետ հարց ու պատասխանի ժամանակ ասաց  ՀՀ կառավարության աշխատակազմի ղեկավար-նախարար Դավիթ Հարությունյանը՝ պատասխանելով պատգամավոր Լյուդմիլա Սարգսյանի հարցին՝  ԱԺ ընտրությունների  անցկացման օրվա հետ կապված քաղաքական ուժերի, իրավաբանների մոտ առաջացրած խառնաշփոթի վերաբերյալ:

Նրա խոսքով,  բազմաթիվ երկրների Սահմանադրություններում էլ լինում են անհամապատասխանություններ, նման իրավիճակում կարևոր է հարցին պատասխանել, թե որ նորմն է տվյալ դեպքում գերակա: Դ. Հարությունյանն ասաց, որ տվյալ դեպքում գերակա է 89-րդ հոդվածը և ընթացակարգային նորմը ստորադասվում է դրան:

Նրա խոսքով, հնարավոր էր երկու ամսաթիվ՝ ապրիլի 2 և 9:

«Կարելի էր նշանակել ապրիլի 9-ին: Իհարկե: Բայց վստահ ենք, որ եթե նշանակվեր 9-ին, լսելու էինք այլ քննադատություն, որ իշխանությունը հնարավորին ուշ է փորձում անցկացնել ընտրությունները: Ցանկացած ամսաթվի նշանակումը կարող էր լինել քննադատության առարկա»,- ասաց Դ. Հարությունյանը:

Նա նշեց, որ ապրիլի 2-ին տոնակատարություն չի իրականացվում երկրում, այլ քվեարկություն. «Բայց եթե այդքան զգայուն հարց է, նախագահի հարցադրումը շատ պարզ է, քանի որ մենք կարող ենք մեկ շաբաթ հետաձգել, բայց պետք է լինի բոլոր քաղաքական ուժերի համաձայնությունը, ովքեր գրանցվեն ընտրություններին մասնակցելու համար»: