Ձեր վստահելի աղբյուրը

«Գրեթե բոլոր պատգամավորներն արտահայտել են իրենց մտահոգությունները այս դեպքի վերաբերյալ, և այստեղ մենք բոլորս միակարծիք ենք»,- այսօր լրագրողների հետ հանդիպմանը անդրադառնալով Բելառուսի կողմից բլոգեր Ալեքսանդր Լապշինի արտահանձմանը Ադրբեջանին՝ ասաց ԱԺ ՀՀԿ պատգամավոր Հովհաննես Սահակյանը:

«Արդյոք պետք էր կամ կարող է Բելառուսը արտահանձնել, սա թողնենք Ռուսաստանին, որովհետև բլոգերը նախևառաջ Ռուսաստանի քաղաքացի է, հետո նոր Իսրայելի, բայց մենք նույնպես շատ գործ ունենք անելու: Առաջարկում եմ Հայաստան և Արցախ հրավիրել հնարավորինս շատ մարդկանց, ովքեր մտահոգված են ազատ տեղաշարժի, խոսքի ազատության բարձր իրավական ուժ ունեցող նորմերի խախտմամբ: Մենք պետք է մեծ թափով լծվենք այդ գործին, հրավիրենք նրանց ծանոթանալու Արցախին, հրապարակայնորեն ցույց տանք դա: Ադրբեջանի սև ցուցակում շատ հասարակական գործիչներ կան: Պետք է այնպես անել, որ այդ ցուցակում շատ ավելի շատերը լինեն, որպեսզի նման դեպքեր այլևս չկրկնվեն: Ամբողջ աշխարհն այժմ տեսնում է շատ քիչ նախադեպ ունեցող կամ նույնիսկ նախադեպը չունեցող մի երևույթ»,-մանրամասնեց Սահակյանը:

Հայաստան-Բելառուս համագործակցությանն անդրադառնալով, նա ասաց, որ Հայաստանի դիրքորոշումը պետք է լինի կոշտ, իսկ դեպքերի բացառմանը հասնելու համար պետք է օգտագործել բոլոր խողովակները: