Ձեր վստահելի աղբյուրը

ԱՆ ՔԿՎ հանրային կապերի բաժինը տարածել է պարզաբանում Ժիրայր Սեֆիլյանի խցում խուզարկություններ անցկացնելու  լուրերի և առգրավված իրերի վերադարձի պահանջի վարաբերյալ: ՔԿՎ պարզաբանման մեջ ասված է.

««Հիմնադիր խորհրդարանը» հայտարարություն է տարածել  Ժիրայր Սեֆիլյանի խցում իբր «աննախադեպ» խուզարկություններ անցկացնելու վերաբերյալ:  Հայտարարության մեջ ակնկալվում է նաև, որ քրեակատարողական հիմնարկի ղեկավարությունը «օր առաջ կվերդարձնի Ժ. Սեֆիլյանից ապօրինաբար առգրավված իրերը»:

Վերոգրյալի  կապակցությամբ  հարկ ենք համարում պարզաբանել, որ հիշատակված պնդումներն  իրականությանը չեն համապատասխանում, և Քրեակատարողական ծառայությունը գործում է բացառապես օրենքի շրջանակում : 

Տեղեկացնենք, որ քրեակատարողական հիմնարկի ներքին կանոնակարգի համաձայն`աշխատակիցները արգելված իրեր հայտնաբերելու նպատակով  իրավունք ունեն կատարել խուզարկություններ, ինչը և պարբերաբար արվում է:

Հավելենք նաև, որ քրեակատարողական հիմնարկի վարչակազմն իրավասու է խուզարկության արդյունքում հայտնաբերված  իրերը կասկած հարուցելու դեպքում ուսումնասիրության նպատակով առգրավել, որոնք արգելված իրերի հատկանիշներ չպարունակելու դեպքում վերադարձվում են»:

Ավելի ուշ հայտարարություն տարածեց նաև գլխավոր դատախազությունը, որտեղ ասված է.

«Ժիրայր Սեֆիլյանի կալանքի պայմանների խստացման վերաբերյալ 2017թ. փետրվարի  7-ի մամուլի հրապարակումների կապակցությամբ տեղեկացնում ենք, որ դրանցում  նշված տեղեկատվությունն ուսումնասիրելու նպատակով նույն օրը ՀՀ գլխավոր  դատախազության պատիժների և հարկադրանքի այլ միջոցների կիրառման օրինականության նկատմամբ հսկողության վարչության կողմից ստուգայց է  կատարվել ՀՀ ԱՆ «Արմավիր» ՔԿՀ:
Ստուգայցի ընթացքում պարզվել է, որ կալանավորված անձ Ժիրայր Սեֆիլյանը 2016թ. դեկտեմբերի 6-ին ՀՀ ԱՆ «Արմավիր» ՔԿՀ ընդունվելուց և նույն օրը  բնակելի գոտու համապատասխան խուց տեղափոխվելուց հետո, այլ վայր չի  տեղափոխվել և այնտեղ է պահվում մինչ օրս: Ժ. Սեֆիլյանի անձնական գործի  ուսումնասիրությամբ պարզվել է նաև, որ ՀՀ ԱՆ «Արմավիր» ՔԿՀ-ում գտնվելու  ընթացքում վերջինիս նկատմամբ օրենսդրությամբ սահմանած իրավական  ներգործության միջոցներ չեն կիրառվել, մասնավորապես՝ նա կարգապահական տույժի չի ենթարկվել: Դատախազի հարցադրմանը Ժ.Սեֆիլյանը պատասխանել է, որ  որևէ խնդիր կամ բողոք՝ կապված իր պահման պայմանների, այդ թվում՝ ՔԿՀ-ի  վարչակազմի գործողությունների և խցի կենցաղային պայմանների հետ, չունի: Նշված ստուգայցի վերաբերյալ կազմվել է համապատասխան արձանագրություն»: