Ձեր վստահելի աղբյուրը

Լապշինի գործի հետ Հայաստանն ու Ղարաբաղը ոչ մի կապ չունեն, պատճառը Բելառուսի և Ռուսաստանի սրված հարաբերություններն են, - այսօր լրագրողների հետ հանդիպմանը նման կարծիք հայտնեց «Կովկասի» ինստիտուտի տնօրեն, քաղաքագետ Ալեքսանդր Իսկանդարյանը։

Իսկանդարյանի խոսքով՝ Ռուսաստանի և Բելառուսի փոխհարաբերությունները վերջին շրջանում սրվել են, նրանք հակասություններ ունեն, իսկ Բելառուսի նախագահը բոլոր հնարավոր միջոցները, այդ թվում ՀԱՊԿ-ի հարթակն օգտագործում է իր շահերն առաջ տանելու համար:

«Բելառուսը ինչ-որ բան արեց, քանի որ Ադրբեջանը ինչ-որ բան է խնդրել, ցանկացել: Իսկ դա արվեց նախագահների մակարդակով։ Իսկ Հայաստանում տվյալ թեմայի վերաբերյալ քննարկումներն արվում են ֆեյսբուքյան քննարկումների մակարդակով»,-ասաց Իսկանդարյանը։

Ինչ վերաբերում է Բելառուսում ՀՀ դեսպանի հետ կանչի հետ կապված խոսակցություններին՝ քաղաքագետն ասաց. «Նախ`  Լապշինը ՀՀ կամ ԼՂՀ քաղաքացի չէ։ Բելառուսն ու Հայաստանն ունեն փոխհարաբերություններ, որոնք մեկ լավ են, մեկ վատ։ Հայաստանը շատ երկրներում ունի դեսպաններ, այդ երկրների հետ փոխհարաբերության ամեն մի վատացումից դեսպան հետ չեն կանչում, եթե այդպես լինի, ոչ մի տեղ դեսպան չի մնա, դեսպանները նրա համար են, որ պահեն այդ հարաբերությունները»։

Իսկանդարյանը հավելեց, որ այստեղ Լեռնային Ղարաբաղի Հանրապետությունը կարող էր նոտա հղել և վերջ։