Ձեր վստահելի աղբյուրը

Լիբերալ ժողովրդավարական կուսակցության նախկին նախագահ, «Հայկական Վերածնունդ» կուսակցության հիմնադիր անդամ ՀՎԿ Երիտասարդական միության հիմնադիր նախագահ Դավիթ Հարությունյանը հանդես է եկել հայտարարությամբ:

Հիշեցնենք, որ մինչ այդ «Հայկական վերածնունդ»-ից հայտնել էին,  որ   երիտասարդակն միության վարչության այսօրվա նիստում որոշում է կայացվել ոչ պարկեշտ վարքագծի պատճառով Դավիթ Հարությունյանին հեռացնել ՀՎԿ երիտմիությունից:

«Ես և իմ գործընկերները մշտապես կողմ ենք եղել քաղաքական դաշտում գաղափարակիցների և համախոհների համախմբմանը։ 2015թ.-ի հունիսին ՕԵԿ նախագահ Արթուր Բաղդասարյանի և մի քանի այլ կուսակցությունների ղեկավարների հետ ես եղել եմ «Հայկական Վերածնունդ» հասարակական-քաղաքական միավորման հիմնադիրներից  և որպես հիմնադիր՝ ես և իմ քաղաքական թիմը լծվեցինք նոր կառույցի կազմավորման աշխատանքներին:

«Հայկական Վերածնունդ» կուսակցության հիմնադիրներից  մեկն ու կառավարման խորհրդի անդամ լինելուց բացի, ընտրվել եմ  «Հայկական Վերածնունդ» կուսակցության  Երիտասարդական միության նախագահ և 2015թ.-ին օգոստոս ամսից մինչ օրս ղեկավարել եմ ՀՎԿ Երիտասարդական միությունը։ Այսօր ես ցավով պիտի արձանագրեմ, որ ես և իմ թիմակիցները սխալվել ենք, երբ միամտորեն հավատում էինք, որ մաս ենք կազմում  ժողովրդական պահանջ ունեցող  ուժի և  գործընթացի։ Մինչդեռ, իրականությունը բոլորովին այլ էր։

«Հայկական Վերածնունդի» և նրա առաջնորդի որևէ խոսք այդպես էլ գործ չդարձավ ու ակնհայտ է, որ երբևէ չի դառնալու։ Համատեղ անցած ճանապարհը ինձ թույլ չի տալիս այս պահին ասել ավելին։ Բայց  չեմ կարող չբարձրաձայնել, որ այն կեղծ և գաղջ մթնոլորտը, որը տիրում է «Հայկական Վերածննդում», խաբեության և ստորաքարշության այն մթնոլորտը, ժողովրդին խաբելու և մոլորեցնելու էժանագին պոպուլիզմը, այլևս  անհամատեղելի են դարձնում իմ և իմ թիմի ներկայությունը «Հայկական Վերածնունդում»։ Ուստի, պաշտոնապես հայտարարում եմ, որ դուրս եմ գալիս «Հայկական Վերածնունդ» կուսակցությունից,  հրաժարվում եմ` ՀՎԿ կառավարման խորհրդի անդամությունից, հրաժարվու մեմ ՀՎԿ Երիտասարդական միության նախագահի պաշտոնից` վստահ լինելով, որ իմ մեծ ներդրումն եմ ունեցել ՀՎԿ–ի ձևավորման և կուսակցության Երիտասարդական միության կայացման գործում: 

Բնականաբար, գիտակցում եմ, որ իմ այս քայլով արժանանալու եմ ոմանց քննադատությանն ու մեղադրանքներին, բայց վստահորեն կարող եմ ասել, որ ով շփվել է այդ թիմի հետ, ով նախկինում եղել է ՕԵԿ անդամ, ՀՎԿ անդամ, կհասկանա ինձ, որ Արթուր Բաղդասարյանի ստեղծած միջավայրը մեկ բան է թելադրում՝ կա՛մ ունենալ արժանապատվություն և հեռանալ ստի ու կեղծիքի այդ կուսակցությունից, կա՛մ հաշտվել այդ կառույցի խաղի անազնիվ կանոնների հետ։ Ես իմ ընկերները ընտրել ենք արժանապատվության ճանապարհը։

Մենք մեզ պատասխանատու ենք համարում մեր երկրի ապագայի համար, մենք կարող ուժ ենք և առաջիկայում կհայտարարենք, թե որ քաղաքական ուժին ենք սատարում։ Ուժ, որը ունի հանրային մեծ վստահություն և ունակ է երկիրը դուրս բերելու այս վիճակից»։