Ձեր վստահելի աղբյուրը

«Մանչեսթեր Յունայթեդի» կիսապաշտպան Անդեր Էրրերան վստահ է, որ մրցակիցները լավագույն քառյակում տեղ զբաղեցնելու համար պայքարում պետք է զգուշանան «կարմիր սատանաներից»։ Հիմա «Մանչեսթեր Յունայթեդն» ընթանում է մրցաշարային աղյուսակի 6-րդ հորիզոնականում, սակայն ընդամենը 5 միավորով է զիջում երկրորդ տեղում հաստատված «Տոտենհեմին»։ Մանկունիանցիներն արդեն Պրեմիեր լիգայի անընդմեջ 15 խաղում պարտություն չեն կրել, և միայն ոչ-ոքիների քանակն է խանգարում՝ զբաղեցնելու ավելի բարձր տեղ։

«Արդյոք վերևում գտնվող թիմերը պետք է վախենա՞ն «Մանչեսթեր Յունայթեդից»։ Դա հենց այն է, ինչ մենք ցանկանում ենք,- Էրրերայի խոսքերը մեջբերել է football.ua-ն։-Համարում եմ, որ մենք առաջնությունում պայքարում ենք 6 թիմի դեմ։ Նկատի ունեմ նաև «Էվերտոնին», որը շատ լավ թիմ է։ Պայքարը խոստանում է շատ բարդ լինել։

Բոլորն ուզում են հայտնվել լավագույն քառյակում, իսկ առջևում դեռ շատ խաղեր կան։ Բայց մենք հիմա լավ դիրքում ենք գտնվում։ Բոլորը մտածում են. «ՄՅու»-ն հետապնդում է մեզ»։ Այո, չկարողացանք հաղթել 3 խաղում, սակայն լավ զգացումներ ունեինք։ Կարծում եմ՝ ավելիին էինք արժանի «Ստոկի» ու «Հալլի» հետ խաղերում»։

Հաջորդ տուրում «Մանչեսթեր Յունայթեդը» կխաղա «Ուոտֆորդի» հետ։