Ձեր վստահելի աղբյուրը

«Նայելով ադրբեջանական մամուլը, լսելով Բելառուսի պաշտոնական անձանց հայտարարությունները, հասկացվում է, որ ամեն ինչ արել են օրենքի տառին համաձայն, մեջբերումներ են անում օրենսդրությունից,  Քիշնևի կոնվենցիայից: Այսինքն ստացվում է, որ ամեն ինչ օրենքով է»,-  լրագրողների հետ հանդիպմանն ասաց «Ընդդեմ իրավական կամայականությունների» ՀԿ գործադիր տնօրեն Լարիսա Ալավերդյանը Բելառուսից բլոգեր, Ռուսաստանի և Իսրայելի քաղաքացի Ալեքսանդր Լապշինին Բաքու արտահանձնելու մասին:

Նա միաժամանակ հիշեցրեց Ռամիլ Սաֆարովի դեպքը, երբ նույնպես շատերը կարծում էին, որ այն ինչ արվել է օրենքով, չի հակասում միջազգային իրավունքի սկզբունքներին, նորմերին:

«Իրականում դա այդպես չէ:  Միջազգային իրավունքի սկզբունքները, նորմերը չեն կարող խրախուսել այդպիսի երևույթներ, որոնք ուղղակիորեն խոսում են մարդու արժանապատվության հանդեպ արհամարհանքի, ուղղակի գրած նորմերի ոտնահարման մասին»,- ասաց Լ. Ալավերդյանը:

Նրա խոսքով, ՄԱԿ-ի պայմանագրում հստակ նշված է որպես իմպերատիվ  նորմ այն դեպքերը, երբ որ այդպիսի տեղափոխումը, հանձնումն ընդունելի չէ, արգելված է. «Այդ նորմերի մեջ ուղղակի գրված է՝  երբ որ ոչ թե քաղաքական հանցագործություն, այլ քաղաքական հանցագործության հետ առնչություն ունեցող որևէ դեպք, երբ որ կա հիմնավորված կասկած, որ այդ անձը համապատասխանորեն պաշտպանված չէ,  կարող է ենթարկվել կտտանքների, դաժան վերաբերմունքի, արժանապատվությունը նստեմացնող վերաբերմունքի:  Այս բոլոր նորմերի խախտումով է տեղի ունեցել Լապշինի հանձնում: Որևէ տառ անգամ չկա,  որը թույլ տա օրինական համարել, էլ չեմ ասում իրավական առումով, այդ հանձնումը»,- ասաց նա:

Ինչ վերաբերում է այն հանգամանքին, թե ինչպես էին Լապշինին դիմավորում Ադրբեջանի օդանավակայանում,  Լ. Ալավերդյանն ասաց. «Կարծես Բեն Լադեն N 2-ի  հանդիպում էին կազմակերպել: Արդեն իսկ արժանապատվությունը նսեմացնող քայլ էր»:

«Տվյալ դեպքում գործ ունենք երկու նախագահների ընկերական, տղայական հարաբերությունների հետ, ովքեր այնքան հեռու են մարդու իրավունքների պաշտպանության գաղափարախոսությունից: Գործ ունենք բոլորովին այլ քաղաքական տարածքի հետ, որտեղ արհամարհվում են ոչ միայն միջազգային նորմերն ու սկզբունքները, այլ սեփական սահմանադրությամբ ամրագրված մարդու իրավունքները»,- ասաց Լ. Ալավերդյանը: