Ձեր վստահելի աղբյուրը

Հայաստանի բռնցքամարտի ազգային հավաքականը, գլխավոր մարզիչ Դավիթ Թորոսյանի գլխավորությամբ, Երևանում շարունակում է ուսումնամարզական հավաք անցկացնել: Մարզիչը ՀԱՕԿ-ի լրատվականի  հետ զրույցում հայտնել է, որ բռնցքամարտիկները պատրաստվում են Սոֆիայում կայանալիք «Ստրանջա» ավանդական մրցաշարին: Դավիթ Թորոսյանի խոսքով` այդ մրցաշարին մասնակցելու են առաջատար մարզիկներ ԱՄՆ-ից, Ճապոնիայից, Կուբայից և այլ երկրներից.

«Այս հավաքին հրավիրվել է 40 մարզիկ: Տարվա կարևորագույն մրցաշարերին մասնակցելու են այն բռնցքամարտիկները, որոնք իրենց կդրսևորեն լավագույն կողմերով: Ռինգը ամեն ինչ ցույց կտա: Շուտով մենք նոր անուններ կունենանք  հավաքականի կազմում, բայց դեռ չեմ շտապում հրապարակել:

Սոֆիայի մրցաշարը մեր մարզիկների համար ուժերը փորձելու լավ հարթակ է: Նախատեսում ենք հանդես գալ բոլոր քաշային կարգերում: Այս տարվա գլխավոր ստուգատեսը աշխարհի առաջնությունն է, որը կկայանա  օգոստոսի 25-ից սեպտեմբերի 3-ը` Համբուրգում: Մինչ այդ հունիսի 14-26-ը Խարկովում հանդես կգանք Եվրոպայի առաջնությունում: Միջազգային ֆեդերացիայի նոր կանոնների համաձայն` աշխարհի առաջնությանը մասնակցելու իրավունք ձեռք բերելու համար  բռնցքամարտիկը մայրցամաքային առաջնությունում պետք է մտնի  1/8 եզրափակիչ փուլ:

Առաջիկայում սպասվում է նաև երիտասարդների Եվրոպայի առաջնությունը (մինչև 22 տարեկաններ), մարտի 13-22-ը Ռումինիայում: Նույն տարիքային խմբի Հայաստանի առաջնությունը վատ եղանակային պայմանների պատճառով, անորոշ ժամանակով հետաձգվել է»,-  խոսքը եզրափակել է  հավաքականի մարզիչը: