Ձեր վստահելի աղբյուրը

Խորհրդարանական ընտրությունների օրը տեղափոխելու վերաբերյալ Սահմանադրական դատարան դիմելու ՀԱԿ նախաձեռնությանը միացել է 19 պատգամավոր: Ազգային ժողովում ճեպազրույցների ժամանակ ՀԱԿ խմբակցության ղեկավար Լևոն Զուրաբյանն ասաց, որ այն ստորգրել են իրենց կուսակցության բոլոր պատգամավորները, «Համախմբում»-ից 5 պատգամավոր, ԲՀԿ-ից՝ Նաիրա Զոհրաբյանը, Միքայել Մելքումյանը, Վահե Էնֆիաջյանը, «Ժառանգություն»-ից՝ Զարուհի Փոստանջյանն ու Թևան Պողոսյանը, անկախ պատգամավորներ Էդմոն Մարուքյանն ու Խաչատուր Քոքոբելյանը:

«Սա է պատկերը: Չեմ կարծում, որ  պետք է սպասել, որ ստորագրությունները կավելանան: Փաստորեն ամեն ինչ արվեց, որ պատշաճ թվաքանակով ստորագրություններ չհավաքվի: Բնականաբար, այս ամենի հետևում կանգնած է իշխանությունը»,- նշեց նա:

Միաժամանակ Լ. Զուրաբյանի կարծիքով, սա կարևոր քայլ էր, քանի  որ ամբողջ հանրությանը ներկայացվեց իրավական ակտի հակասահմանադրականությունը:

«Սա սկզբունքի հարց էր: Այն ուժերը, պատգամավորները, ովքեր իրենց հորջորջելով ընդդիմադիր, սկզբունքային, չեն ստորագրել այս դիմումը, թող իրենք պատասխանեն հանրության հարցադրումներին»,- ասաց ՀԱԿ խմբակցության ղեկավարը:

Նշենք, որ ՍԴ դիմելու համար անհրաժեշտ էր 27 ստորագրություն: