Ձեր վստահելի աղբյուրը

«Պետք է բոլորի հանդեպ հարգալից լինենք, ցանկացած կուսակցության: Որևէ մեկին վիրավորել չի կարելի, վիրավորում է թույլ մարդը, ով իրենից բան չի ներկայացնում, իր նախանձից կարող է մյուսի հասցեին բան ասել: Ուժեղ, հզոր, հարգված մարդը երբեք նման բան չի անի»,- «Բարգավաճ Հայաստան» կուսակցության համագումարում դիմելով իր թիմակիցներին՝ ասաց  կուսակցության նախագահ ընտրված Գագիկ Ծառուկյանը:

Շարունակելով իր խոսքը՝ նա հավելեց. «Բայց եթե որևէ մեկը փորձի ձեզ վիրարավորել, ձեր պատիվը իմ պատիվն է, իմը՝ ձերն է, ուրեմն այնպես կդնենք իրեն տեղը՝ որտեից է եկել, ինչի համար է եկել, նպատակն ինչ է: Նորից խնդրում եմ, հարգալից, տեղը տեղին ցանկացած քաղաքական ուժի հետ: Թող իրենք իրենց ծրագրերը ներկայացնեն, իրենց արածը, ինչ կարող են անել:  Մենք ասում ենք՝ պաշտոնի համար չենք պայքարում, գումարի համար չենք պայքարում: Մենք ուզում ենք լավ լինի: Ես, իրոք, իմ  ժողովրդին շատ եմ սիրում: Իրոք, ոսկի մարդիկ են, հյուրասեր: Ես իմ ժողովրդի հետ եմ, իմ ժողովրդի առաջ պարտք ունեմ: Եթե ինձ հնարավորություն ստեղծվի իմ թիմով հասնել հաջողության, իմացեք՝ օր-օրի ամեն մեկը դա իր վրա զգալու է: Չեմ եկել համոզելու, պարտադրելու»:

Գ. Ծառուկյանի խոսքով, գալիք ընտրությունից է կախված վաղվա ապագան:

«Ամեն մարդ իր ընտրությունը կատարելու իրավունք ունի: Այդ հնարավորությունը տրվել է, որ մարդ ծանոթանա բոլորի ծրագրերին, նաև կարևոր է, թե այդ մարդն ինչ գործ է արել իր կյանքում, ու կատարի իր ընտրությունը: Ընտրողները պետք է որոշեն իրենց վաղվա համար, իրենց ապագայի համար»,- ասաց նա: