Ձեր վստահելի աղբյուրը

ՀՀ ԱՆ «Դատապարտյալների հիվանդանոց» քրեակատարողական հիմնարկի կալանավորված անձ, «Սասնա ծռեր» զինված խմբին օժանդակելու մեջ մեղադրվող Արթուր Սարգսյանը, ով առավել հայտնի է «Հաց բերող» անունով, դիմում-հայտարարությամբ է հանդես եկել՝ ուղղված ԱՆ «Դատապարտյալների հիվանդանոց» քրեակատարողական հիմնարկի պետ արդարադատության գնդապետ Արսեն Աֆրիկյանին:

Դիմումում, որը իր ֆեյսբուքյան էջում հրապարակել է նրա փաստաբան Տիգրան Եգորյանը, նա նախ թվարկել է, թե ինչպիսի հիվանդություններով է  տառապում, ապա տեղեկացրել, որ  փետրվարի 9-ին Արաբկիր և Քանաքեռ-Զեյթուն վարչական շրջանների առաջին ատյանի դատարանը՝ Ա. Մկրտչյանի նախագահությամբ, բավարարել է ՀՀ հատուկ քննչական ծառայության կոռուպցիոն, կազմակերպված և պաշտոնեական հանցագործությունների քննության վարչության պետի տեղակալ Էդ. Հակոբյանի միջնորդությունը՝ իր նկատմամբ երկու ամիս ժամկետով կալանավորում որպես խափանման միջոց կիրառելու մասին: Ա. Սարգսյանն իր դիմումում գրել է, որ Էդ. Հակոբյանի և Ա. Մկրտչյանի  գործողություններն  ապօրինի են, չեն բխում ՀՀ օրենքներից: 

«Հաշվի չառնելով իմ առողջական ծանր վիճակը, հայտարարում եմ հացադուլ: Հայտարարում եմ նաև, որ իմ հետագա առողջական վիճակի էլ ավելի վատթարացման դեպքում մեղավոր ճանաչել Էդ. Հակոբյանին և Ա.Մկրտչյանին, քանի որ նրանք իրենց գործողություններով դրդեցին ինձ այս քայլի»,- գրել է նա:

Նշենք, փաստաբան Տիգրան Եգորյանը «Ազատության» հետ զրույցում ասել էր, որ ՀՔԾ-ն Ա. Սարգսյանի  ձերբակալման հիմք է համարել այն, որ նա  փետրվարի 3-ին չի ներկայացել քննչական մարմնին: Մինչդեռ, փաստաբանի խոսքով, նախապես քննիչին տեղյակ են պահել չներկայանալու մասին և խնդրել փոխել հանդիպման օրը:

Հիշեցնենք՝  ըստ պաշտոնական հաղորդագրությունների, Արթուր Սարգսյանը ճեղքել էր ոստիկանական պատնեշը և սնունդ հասցրել ոստիկանության ՊՊԾ գունդը գրաված «Սասնա ծռերի» անդամներին։ Նա մեղադրվում է պատանդներ պահելուն և զենք-զինամթերք տեղափոխելուն ու պահելուն օժանդակելու մեջ: Արթուր Սարգսյանը ձերբակալվել էր հուլիսի 31-ից, դեկտեմբերի 31-ին կալանքից ազատվել էր: