Ձեր վստահելի աղբյուրը

Տեխնիկական սարքավորումները որոնք կիրառվելու են խորհրդարանական ընտրությունների ժամանակ, ծրագրային ապահովումը նախապատրաստվել են, բայց այս ՏԻՄ ընտրությունների ընթացքում մենք փորձարկում ենք այդ սարքավորումները, թե ինչպես են պրակտիկորեն աշխատում,- անդրադառնալով Սենյոնովկա համայնքի ՏԻՄ ընտրություններում առաջիկա խորհրդարանական ընտրություններում կիրառվելիք ընտրողների էլեկտրոնային գրանցում իրականացնող տեխնիկական սարքավորումների փորձարկման գործընթացին «Panorama.am»-ի թղթակցի հետ զրույցում նշեց ԿՀԸ նախագահ Տիգրան Մուկուչյանը:

Հիշեցնենք, որ ՀՀ կենտրոնական ընտրական հանձնաժողովի նախաձեռնությամբ` Արագածոտնի, Արարատի, Արմավիրի, Գեղարքունիքի, Կոտայքի, Շիրակի և Սյունիքի մարզերի թվով 10 համայնքներից 2-ում` Գեղարքունիքի մարզի Սեմյոնովկա և Արմավիրի մարզի Վարդանաշեն համայնքներում, փորձարկվելու են 2017 թվականի ապրիլի 2-ի ԱԺ հերթական ընտրությունների ժամանակ տեղամասային ընտրական հանձնաժողովներին տրամադրվելիք ընտրողների էլեկտրոնային գրանցում իրականացնող տեխնիկական սարքավորումները:

ԿԸՀ նախագահի խոսքով, այսօրվա նպատակը բոլոր թերությունների վերհանումն է:

«Մենք փորձում ենք սարքի առավելագույն կիրառելիության հնարավորությունները, որի գերնպատակն է վերհանել թերությունները: Որովհետև դեռևս կա ժամանակ և եթե կան ինչ-ինչ թերի, ոչ լիարժեք տեխնիկական լուծումներ, ապա այդ ամբողջը մինչև խորհրդարանական ընտրություններ վերացվեն և ընտրությունների ժամանակ մենք կիրառենք տեխնիկական սարքավորումներ, որոնք զերծ կլինեն որևէ թերություններից»,- նեց Մուկուչյանը և հավելեց, որ որոշ խնդիրներ նկատվել են, նաև՝ «նշմարվել են որոշ նոր լուծումներ», այդ բոլորը մանրամասն գույքագրվում է:

ԿԸՀ նախագահի խոսքով, քվեարկության ավարտից հետո կուսումնասիրվեն բոլոր նկատված թերությունները, դրանք կներկայացվեն այն մասնագետներին, որոնք զբաղվում են ծրագրային ապահովման մշակմամբ, որպեսզի վերջիններս համապատասխան ծրագրային լուծումներ գտնեն կամ եթե թերության մասին է խոսքը, ապա վերացվեն այդ թերությունները:

ԿԸՀ նախագահի համոզմամբ, բոլոր արձանագրված թերությունները շտկելի են, քանզի հենց այս փորձարկման նպատակը դա է:

Անձամբ ներկա լինելով ընտրական պրոցեսին, մասնավորապես այդ սարքավորումների միջոցով ընտրողների գրանցումներին Մուկուչյանը նշեց, որ ըտրողները առանձնապես դժվարություններ չէին ունենում, քանզի տեխնիկական սարքավորումների մոտ նստած են մասնագետներ:

«Մեծ բարդություն չի ներկայացնում` ըստ էության, ընտրողը ներկայացնում է անձը հաստատող փաստաթուղթը, մասնագետը ներմուծում է սարքավորման մեջ, հանձնում են մատնահետք և տպագրվում է կտրոն: Ընտրողի համար այս փուլը գուցե մեկ լրացուցիչ փուլ է, բայց որևէ լրացուցիչ խնդիր չի առաջացնում»,- նշեց ԿԸՀ նախագահը:

Տեխնիկական սարքավորումների այս փորձարկումը Մուկուչյանը կարևորեց այն առումով նաև, որ առաջիկայում լինելու է տեխնիկական սարքավորումներն աշխատացնող մասնագետների ուսուցման հետ կապված գործառույթ:

«Պետք է իրականացվի այն անձանց ուսուցումը, որոնք տեղամասային կենտրոններում սպասարկում են տեխնիկական սարքավորումները: Խոսքը մոտ 4000 քաղաքացու մասին է, իսկ մենք նախատեսում ենք որ ուսուցում պետք է կազմակերպենք մոտ 6000 քաղաքացու համար, որպեսզի հետագայում ստուգարքների արդյունքում ձևավորվի այն 4000 անձնացից բաղկացած թիմը, որոնք տեղամասային կենտրոններում իրականացնելու են այդ աշխատանքը: Մենք փորձում ենք այսօր նաև այդ աշխատանքի ընթացքում մասնագետին առաջադրվող պահանջների ուշադրության արժանի հանգամանքները նույնպես առանձնացնենք: Դրանք շատ կարևոր են, որ հետագայում երբ կսկսվեն դասընթացները, այդ ժամանակ շեշտադրումներ արվեն այդ խնդիրների վրա, որպեսզի այդ մասնագետները տեղամասային կենտրոններում արդեն լիարժեք ծավալով տիրապետեն տեխնիկական սարքավորմանը և լիարժեք ձևով գործարկեն»,- նշեց Մուկուչյանը: