Ձեր վստահելի աղբյուրը

Գեղարքունիքի մարզի Սեմյոնովկա համայնքի ՏԻՄ ընտրությունների ժամանակ ընտրողների էլեկտրոնային գրանցում իրականացնող տեխնիկական սարքավորումների փորձարկման գործընթացին, որպես փորձարարական ծրագրով դիտարկող ներկա է ՀՀ կառավարության աշխատակազմի ղեկավար նախարար Դավիթ Հարությունյանը:

«Այս փորձարկումը չենք կապելու ընտրության հետ»,- «Panorama.am»-ի թղթակցի հետ զրույցում նեց Դավիթ Հարությունյանը:

«Մենք ընդամենը ընտրությունը օգտագործել ենք որպես առիթ: Այս փորձակրումը մաս չէ ընտրական գործընթացի մենք ուղղակի խնդրում ենք բոլոր ընտրողներին իմիտացիա անել ապրիլի 2-ը: Ընտրողները մոտենում են գրանցվում են սարքի միջոցով, թեև հետո մոտենում են նաև գրանցվում են գրանցամատյանում, դասական եղանակով, որովհետև ըստ ընտրական օրենսգրքի այս ընտրություններն անցկացվում են դեռևս հին ընտրական օրենսգրքով: Բայց ընտրողները մեր խնդրանքին ընդառաջում և մասնակցում են»,- նշեց պաշտոնյան:

Դ.Հարությունյանի խոսքով ծրագրային ապահովումը դեռևս ամբողջական ավարտված չէ, այն պետք է ավարտված լինի մարտի սկզբին:

«Այս փուլում ընդամենը մի մասն է ավարտված և մենք հենց այդ մասն էլ փորձարկում ենք»,- հայտնեց նա և հավելեց, որ փորձարկման ընթացքում լինում են թերություններ այս ընտրություններում սարքերի փորձարկման բուն նպատակը հենց դա է՝ «վեր հանել բոլոր թերությունները»:

«Երբ մենք իմիտացիա ենք անում տարբեր հնարավոր տարբերակներ մի քանի սարքի զուգահեռ աշխատանքի հետ, լինում են նաև թերություններ: Սխալներ շատ քիչ ենք հայտնաբերել, թերություններն էլ հիմնականում տեխնիկական բնույթի են:

Օրինակ կտրոնը, որը տպվում է շատ երկար է, կարելի է այն կարճացնել, կամ ընտրողի հերթական համարը, որը հետագայում օգտագործվում է մատյանում համապատասխան գրառում կատարելիս կարելի է ավելի մեծացնել, որ ավելի տեսանելի լինի: Այո՛, նմանատիպ թերություններ նշմարում ենք, որոնք շտկելու ենք մինչև ապրիլի 2-ը»,- իրենց կողմից գտած թերությունները նշեց Դ.Հարությունյանը:

Անդրադառնալով սարքերի միջոցով գրանցվելու ժամանակ ընտրողների համար հնարավոր դժվարություններին, Հարությունյանը նշեց, որ ընտրողները տեխնիկական սարքավորումների հետ շատ առնչություն չունեն:

«Հիմնականում տեխնիկական մասնագետներն են առնչվում սարքավորումների հետ, որոնք վերցնում են ընտրողի անձնագիրը և կազմակերպում են գրանցման պրոցեսը: Այս պահին որևէ դժվարություն մենք չենք նկատել»,- ասաց Դ.Հարությունյանը:

«Այս փորձարկման ժամանակ իմիտացիա են արվում նաև բոլոր հնարավոր սխալները, կրկնակի քվեարկության դեպքեր են իմիտացիա արվում, կողքի տեղամասից են գալիս ընտրողներ փորձում գրանցվել, որ տեսնեն սարքը բացահայտում է դա թե ոչ: Այդ հիմնական ստուգումներն այս պահին նորմալ ընթանում են, ինչպես արդեն նշեցի մեկ-երկու սխալներ ենք հայտնաբերել մի քանի թերություն որոնք կշտկենք: Օրինակի համար մենք ստուգում ենք իրական պայմաններում քանի վայրկյանում է սինխրոնիզացվում սարքը, հասկացել ենք, որ այդտեղ աշխատելու տեղ ունենք: Այո՛, բոլոր թերությունները հանգիստ կշտկվեն ապրիլի 2-ին չենք ունենա»,- նշեց նա: