Ձեր վստահելի աղբյուրը

Խորհրդարանական ընտրություններին մասնակցելու վերաբերյալ վերջնական որոշում դեռ չենք ընդունել: Այսօր հրավիրած ասուլիսում հայտարարեց «Երրորդ հանրապետություն» կուսակցության ղեկավար Վիկտոր Դալլաքյանը:

«Մենք, իրոք, լայն կոնսոլիդացիայի կողմնակից ենք: Ես բազմիցս դա հայտարարել եմ: Ես այն քաղաքական գործիչն եմ, ով փորձել է իր բոլոր հնարավորությունները, նաև անձնական կապերն օգտագործել, որպեսզի տեղի ունենա Սեյրան Օհանյան-Գագիկ Ծառուկյան համագործակցություն: Ցավոք սրտի  ինչ-ինչ պատճառներով դա տեղի չի ունեցել»,-ասաց նա:

Դալլաքյանն ասաց, եթե այդ համագործակցությունը տեղի ունենար, ապա Հայաստանում կարող էր ձևավորվել լուրջ բևեռ, որը կարող էր  իրականացնել արմատական փոփոխություններ:

«Գագիկ Ծառուկյանի հետ իմ հանդպումների ընթացքում ես նրա մոտ նկատել եմ ցանկություն համագործակցել Սեյրան Օհանյանի շուրջ համախմբած որոշակի կուսակցությունների հետ: Բայց Ծառուկյանին ներկայացրել են անիրականանելի առաջարկություններ, ինչն անհնար է դարձրել այդ համագործակցությունը»,-նշեց նա:

Հարցին, հնարավոր է Ծառուկյանի դաշինքի կազմում Դալլաքյանը մասնակցի ընտրություններին, նա նշեց, դեռ  ձևաչափի մասին քննարկումներ չեն եղել:

«Ինչ վերաբերում է իմ և Ծառուկյանի հարաբերություններին, ապա դրանք անձնական,  ջերմ, մտերմիկ հարաբերություններ են, որի ժամանակ ես նրա հետ չեմ քննարկել Արամ Սարգսյանի կամ մեր կուսակցության համագործակցության հետ կապված խնդիրները: Ես ընդամնեը ձեզ ասեցի, որ Ծառուկյանի համապատասխան հայտարարությունից հետո ես կարող եմ որոշ փակագծեր բացել»,-ասաց նա:

Նրա խոսքով, նա մերժել է  Սամվել Բաբայանի առաջարկությունները, քանի որ կուլուարային, ստվերային պայմանավորվածություններն իր համար անընդունելի են:

«Ես ուզում եմ փակագիծ բացել: Պատճառներից մեկը համագործակցությունը դադարեցնելու  նաև դա է: Որովհետև Բաբայանը ներկայացնում է «Համախմբումը» և լոբբինգ է անում դրա օգտին»,-հայտնեց նա:

Նա նաև ներկայացրեց Օհանյան-Րաֆֆի-Օսկանյան դաշինիքի ցուցակում  ընդգրկված անդամներին՝ Սեյրան Օհանյան,  Րաֆֆի Հովհաննիսյան, Վարդան Օսկանյան, ԷԼինար Վարդանյան, Անդրանիկ Թևանյան, Վահե Հովհաննիսյան, Արմեն ՄԱրտիրոսյան, Սուսաննա Մուրադյան, Երվանդ Բոզոյան, Ստեփան Մարգարյան:

«Ցուցակում ընգրկված անձանցից 10-ից 7-ը «Համախմբման» անդամներ են: Կարծում եմ, մեկնաբանություններն ավելորդ են»,-հայտարարեց նա: