Ձեր վստահելի աղբյուրը

ՀՀ պաշտպանության նախկին նախարար Սեյրան Օհանյանը, ՀՀ արտաքին գործերի նախկին նախարար, «Համախմբում» կուսակցության նախագահ Վարդան Օսկանյանը և «Ժառանգություն» կուսակցության նախագահ Րաֆֆի Հովհաննիսյանը  խորհրդարանական ընտրություններին ընդառաջ ստորագրեցին «Օհանյան-Րաֆֆի-Օսկանյան» դաշինքի ստեղծման հուշագիրը:

Նախքան ստորագրելը «Ժառանգություն» կուսակցության փոխնախագահ Արմեն Մարտիրոսյանը հայտարարեց, որ նոր Սահմանադրության պայմաններում ապրիլին կայանալիք խորհրդարանական ընտրությունները միակ համապետական ընտրություններ են, որոնց միջոցով ձևավորվելու է իշխանություն:

«Չմասնակցել կարևորագույն քաղաքական գործընթացին, չպայքարել քաղաքացու ընտրական իրավունքի իրացման համար, անթույլատրելի է: Չպայքարել  չենք կարող: Երեք փորձառու պետական գործիչները միավորվում են նոր որակի իշխանություն ձևավորելու, ինքնիշխանությունը պահպանելու, արմատական բարեփոխումների համար: Սա միավորում է, որտեղ կուտակված է  պետական կառավարման փորձը, իրագործվող տեսլականը: ԱԺ ընտրություններին մասնակցելու ենք միասին»,- ասաց նա՝ հավելելով, որ դաշինքը բաց է քաղաքական ուժերի, քաղհասարակության համար:

Դաշինքային համաձայնագիր
Գիտակցելով, որ մեր երկրի ներքին ու արտաքին մարտահրավերներին դիմագրավելու համար անհրաժեշտ է նոր որակի իշխանության ձևավորում,
Ընդունելով, որ հանրային կյանքի բարելավման, մարդու և քաղաքացու իրավունքների պաշտպանության ու պետության ներսում առկա խնդիրների լուծման համար պետք է մի կողմ դնել անձնական հավակնությունները և առաջնորդվել բացառապես պետական շահով,
Ընդառաջ գնալով հանրային պահանջին, ըստ որի՝երկրում ստեղծված իրավիճակից դուրս գալու համար անհրաժեշտ է քաղաքական ու հասարակական ուժերի լայն համախմբում,
Կարևորելով առաջիկա խորհրդարանական ընտրությունների դերն ու նշանակությունը,
Մենք կնքում ենք դաշինքային համաձայնագիր և ԱԺ ընտրություններին մասնակցելու ենք միասին:
Սույն համաձայնագրի բաղկացուցիչ մաս է կազմում հավելվածում ներկայացված «Նոր օրակարգը»:
Դաշինքային համաձայնագիրը բաց է քաղաքական ուժերի, հասարակական միավորումներ, քաղաքացիական շարժումների և ՀՀ ու ԼՂՀ ապագայով մտահոգ քաղաքացիների համար:

Սեյրան Օհանյան                      Րաֆֆի Հովհաննիսյան                       Վարդան Օսկանյան