Ձեր վստահելի աղբյուրը

«Զարուհի Փաստանջյանն ի սկզբանե տեղյակ է եղել, որ եթե ցանկանա, ինքը ցուցակում լինելու է առաջին կին թեկնածուն»,- «Օհանյան-Րաֆֆի-Օսկանյան» դաշինքի ստեղծման հուշագրի ստորագրումից հետո լրագրողների հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը:

Նրա խոսքով, էական չէ, թե որ համարը կլինի, այլ այն, որ լինելու է առաջին կին թեկնածուն:

«Ինքն այդ մոտեցմանը դեմ է եղել: Եթե Զարուհի Փոստանջյանը ցանկանա այս դաշինքում ընդգրկվի, անմիջապես այդ պահանջը, խնդրանքը, առաջարկը կհարգվի»,- ընդգծեց Ա. Մարտիրոսյանը: 

Հիշեցնենք, որ ավելի վաղ Զարուհի Փոստանջյանը տարածել էր հայտարարություն՝ նշելով, որ  դեմ է արտահայտվում «Ժառանգության» կողմից ընտրություններին դաշինքով մասնակցելուն:

Ա.Մարտիրոսյանն ասաց, որ «Ժառանգությունը» ողջունում է, որ կուսակցության ներսում կա տարաձայնություն, քանի որ իսկապես ժողովրդավարական կուսակցություն է:

«Դրա համար նույնիսկ եթե դեմ է, բայց ցանկություն ունի մասնակցել դաշինքային պայքարին, մենք  միայն կարող ենք  ողջունել:   Որևէ խոսք լինել չի կարող»,- ասաց «Ժառանգության» փոխնախագահը:

Նա տեղեկացրեց, որ նախօրեին կայացած «Ժառանգության» վարչության նիստին չի մասնակցել միայն Զարուհի Փոստանջյանը, իսկ մյուս ներկաները կողմ են եղել  ընտրություններին «Օհանյան-Րաֆֆի-Օսկանյան» դաշինքով հանդես գալուն, միայն մեկ ձեպահ է եղել:
Հարցին, թե հնարավո՞ր է Զարուհի Փոստանջյանը դուրս գա կուսակցությունից, Ա. Մարտիրոսյանն ասաց, որ հույս ունի՝ ոչ:

Միաժամանակ նա նշեց. ««Ժառանգությունը»  պայքարի փորձ ունի  նաև առանց տիկին Փոստանջյանի»:

Արմեն Մարտիրոսյանն ասաց, որ այն, ինչ իրենք հիմա սկսել են, իրենց պայքարի շարունակությունն է:

«Որքան էլ ցեխ շպրտեն «Ժառանգության» պահով, ժամանակն ապացուցել է միշտ, որ «Ժառանգությունն» իրական պայքարի գծում է եղել: Այս անգամ ևս վերահաստատում ենք, որ բացառապես պայքարի դաշտ է լինելու, մենք իսկապես գնում ենք պայքարելու»:
Նա տեղեկացրեց, որ «Օհանյան-Րաֆֆի-Օսկանյան» դաշինքին միացել է «Ժողովրդական», «Արդարություն» կուսակցությունները, «Միացյալ հայեր», «Կարմիր բերետներ», «Անկախ դատարաններ» ՀԿ-ները: