Ձեր վստահելի աղբյուրը

«Ընդդիմադիր  դսշտում գործող  քաղաքական ցանկացած ուժի հետ պատրաստ ենք համագործակցել և ընտրությունների ընթացքում, և ընտրություններից հետո»,-  «Օհանյան-Րաֆֆի-Օսկանյան» դաշինքի ստեղծման հուշագրի ստորագրումից հետո լրագրողների հետ զրույցում ասաց ՀՀ արտաքին գործերի նախկին նախարար, «Համախմբում» կուսակցության նախագահ Վարդան Օսկանյանը:

Խոսելով «Ծառուկյան» դաշինքի հետ համագործակցության հնարավորության մասին, նա նշեց, որ ինչքան մոտենում են ցուցակների ներկայացման օրը, դաշինք կազմելու հնարավորությունը նվազում է. «Բայց միշտ էլ հետընտրական շրջանում այդ հնարավորությունը լինում է: Երկուսս էլ ընդդիմադիր դաշտում ենք, ունենք մեր ընտրազանգվածը»:

Անդրադառնալով Վիկտոր Դալլաքյանի հայտարարություններին, Վ. Օսկանյանն ասաց, որ  ինքը ցուցակների կազմման ու տեխնիկական բանակցություններում մասնակցություն չի ունեցել:

«Մեր կողմից ստեղծվել է բանակցային, աշխատանքային խումբ, որը վարել է բանակցությունները: Իսկ այդ աշխատանքային, բանակցային խմբում Սամվել Բաբայանը որևէ դեր ու տեղ չի ունեցել»,- ասաց Վ.Օսկանյանը :

Նա նաև ասաց, որ տեղյակ չէ, թե ինչ ցուցակ է ներկայացրել Վ. Դալլաքյանը: