Ձեր վստահելի աղբյուրը

«Մեզ համար այս ընտրություններն  այս փուլում իր մեջ ներառում է  երկու խնդիր. առաջին և ամենահիմնական խնդիրը քարոզարշավի ընթացում այնպես անել, որպեսզի ունենանք մաքսիմալ քվե, երկրորդ խնդիրը՝ կարողանանք պահել այդ քվեն»,- «Ելք» դաշինքի՝ ընտրությունների համամասնական ցուցակի առաջին երեք անդամներին քվեարկությամբ ընտրելու ժամանակ  լրագրողներին ասաց դաշինքի անդամ «Հանրապետություն» կուսակցության քաղխորհրդի նախագահ Արամ Զավենի Սարգսյանը:

Պատասխանելով հարցին, թե դուք «Արդարություն» դաշինքի կազմում բոյկոտում էիք,  ՀԱԿ-ի դեպքում վայր դրեցիք մանդատը,  այս անգամ գնալո՞ւ եք խորհրդարան, նա ասաց. «Այն երկու ընտրությունների ժամանակ Հայաստանում գործում էր այլ Սահմանադրություն, խորհրդարանի գինն ու արժեքը բացարձակ ուրիշ էր: Նոր Սահմանադրությամբ, որին ես կողմնակից չեմ եղել, Հայաստանի ապագա կառավարության ձևավորման միակ աղբյուրն է, քաղաքական ուժը չի կարող կառավարության ձևավորման  գործընթացին չմասնակցել: Այո, մնալու եմ»:

Հարցին, եթե Ազգային ժողովում ձևավորեք մեծամասնություն, ո՞վ է լինելու «Ելք» դաշինքի վարչապետի թեկնածուն, Ա. Սարգսյանն ասաց, որ «Ելք» դաշինքը մեծամասնություն ձևավորելուց հետո կոնսենսուսով կորոշի վարչապետի իր թեկածուին: Նա նշեց, որ ոչ նախագահի, որ ԱԺ նախագահի թեկնածուներին նույնպես չեն որոշել:

Հարցին, թե Սեյրան Օհանյանն ընդդիմադի՞ր է,  Ա.Սարգսյանն ասաց. «Այդ հարցին պատասխանելու համար պետք է նայել նշյալ դաշինքի («Օհանյան-Րաֆֆի-Օսկանյան») գործունեությանը: Ընդհանրապես, այդպես է՝  ծառին  ճանաչում են պտղով: Երբ որ ծառը պտուղ կտա, ըստ դրա էլ կորոշենք ՝ընդդիմադիր է, թե ոչ: Բարդ  հարց է: Եթե մարդ, իմ կարծիքով, մտնում է ընդդիմադիր դաշտ,  պետք է խոստովանի, որ 2008 թվականին 1200 քաղբանտարկյալ կար, և ինքը չի ասել, որ դրանք քաղբանտարկյալ են: Այն ժամանակվա քաղբանտարկյալներն իսկապես քաղբանտարկյալներ էին, բառիս բուն իմաստով»:

Նա  նշեց, որ դաշինքի մոտեցումը մոտ է ՀՀԿ-ին, կարող են միասնական մասնակցել ընտրություններին՝ նույն գաղափարական հենքի վրա են, նույն ճանապարհով գնացող: