Ձեր վստահելի աղբյուրը

«Ադրբեջանում սոցիալական մեդիաներում ստեղծվել է շատ բացասական իրավիճակ, այն ավելի շատ աշխատում է հակամարտության սրացման ուղղությամբ»,-Panorama.am-ի հետ զրույցում ասաց մեդիափորձագետ Սամվել Մարտիրոսյանը:

Նա մասնակցում է «Ստեփանակերտի շրջափակման ճեղքումը. 25 տարի անց» խորագրով միջազգային փորձագիտական կոնֆերանսին, ելույթ է ունենալու «Հռետորաբանությունը և նարատիվները սոցիալական ցանցերում» թեմայով:

Նրա կարծիքով, սոցիալական մեդիան կարող էր լինել երկխոսության հարթակ, որտեղ քննարկվեին վիճելի հարցեր:

«Դա այդպես էր մինչև տասը տարի առաջ: Հայկական և ադրբեջանական ֆորումներում գոյություն ունեին բաժիններ, որոնք խիստ մոդեռացվում էին, թույլ չէր տրվում գռեհիկություններ, բայց հայերն ու ադրբեջանցիները քննարումներ էին ծավալում վիճելի հարցերի շուրջ:  Իրավիճակը հիմնականում ծայրահեղ վատացավ,  երբ իշխանության եկավ Իլհամ Ալիևը: Պետականորեն խնդիր դրվեց ծավալել հակահայկական քարոզչություն, ճնշել բոլոր այն օջախները, որտեղ կար քիչ թե շատ փորձ  հայերի հետ ինչ-որ երկխոսության գնալ՝ քննարկումների մակարդակով: Բացահայտ քրեորեն հետապնդվեցին  այն մարդիկ, ովքեր երկխոսության էին գնում հայերի հետ, մի շարք արշավներ անցկացվեցին, հասարակական պարսավանքի ենթարկվեցին այն անձիք, ովքեր նույնիսկ սոցիալական ցանցերում ունեին հայ ընկերներ»,- ասաց Ս. Մարտիրոսյանը:

Մեդիափորձագետի խոսքով, այս ամենը բերեց նրան, որ  այսօր միայն ատելության խոսք է տարածվում ցանցով: Ս. Մարտիրոսյանն ասաց, որ այսօր կան ադրբեջանից օգտատերեր, բլոգերներ, որոնց հետ շփում են, բայց քիչ են, շատերը  ձգտում են բաց շփում չիրականացնել:

«Շատերը ցուցադրաբար հակահայականության են ցուցաբերում, քանի որ ինչ-որ պահից սկսում են մեղադրել նրանց, որ կասկածելի են, քիչ են հայերի մասին գրում, խոսում»,- ասաց փորձագետը: