Ձեր վստահելի աղբյուրը

Թուրքիայի քաղաքացի, աշխարհահռչակ հայ լուսանկարիչ Արա Գյուլերը ներկա է գտնվելու Գերմանիայի Նյուրնբերգ քաղաքի Թաֆելհալլե թատրոնում կայանալիք «Թուրք-գերմանական ֆիլմերի փառատոնի» բացման արարողությանը: Նա արժանացել է փառատոնի բացումը կատարելու պատվին: Գրում է «Էրմենիհաբեր»-ը՝ վկայակոչելով  թուրքական «Sozcu» թերթին:

Բացման արարողության ժամանակ Գյուլերը, ինչպես նաև գերմանացի կինոօպերատոր Յուրգենը Յուրգեսը պատվո շքանշաններ են ստանալու:

Կինոֆառատոնն  ընթանալու է  մարտի 4-12-ը: Նշվում է, որ կինոփառատոնի ժամանակ ցուցադրվելու է նաև թուրք ռեժիսոր Օսման Օքքանի նկարահանած «Արա Գյուլեր-Ստամբուլի լեգենդ» վավերագրական ֆիլմը:  Ցուցադրությունից հետո Գյուլերը և Օքքանը հանդես կգան ելույթով:

Աղբյուրը տեղեկացնում է, որ կինոփառատոնի շրջանակներում խաղարկվելու են «Ամենալավ լիամետրաժ ֆիլմ», «Ամենալավ կարճամետրաժ ֆիլմ», «Ամենալավ կին դերասանուհի», «Ամենալավ տղամարդ դերասան» խորագրերով մրցանակներ:

Ամենալավ լիամետրաժ և կարճամետրաժ ֆիլմերի համար նախատեսված մրցանակներին հավակնում  է 10 ֆիլմ: Հաղթող ֆիլմերի անունները հայտնի կդառնան մարտի 11-ին: