Ձեր վստահելի աղբյուրը

ՀՀ վարչապետ Կարեն Կարապետյանն այսօր Երևանի պետական համալսարանում հանդիպեց ուսանողների հետ, ներկայացրեց վերջին չորս-հինգ ամիսների ընթացքում Կառավարության կատարած աշխատանքները:

«Ես հատուկ վերաբերմունք ունեմ Երևանի պետական համալսարանի նկատմամբ, բայց մեր հանդիպման պատճառը դա չէ: Կառավարությունը բազմիցս է ասել, որ մեզ համար շատ կարևոր է հետադարձ կապ ունենալ հասարակության հետ և փորձել բարձրացնել քաղաքացիական ակտիվությունը, փորձել հասկանալ ՝ ճի՞շտ ենք գնում թե՞ ոչ»,- ասաց վարչապետը:

Կարեն Կարապետյանն անդրադառնալով  իր կառավարման հինգ ամիսների ընթացքում Կառավարության կատարած աշխատանքներին, նշեց, որ  յուրաքանչյուր ճյուղի վերաբերյալ տրվել  է ախտորոշում, թե ինչ խնդիրներ, ինչ հիվանդություններ ունեն այդ ճյուղում:

«Յուրաքանչյուր ճյուղին տալիս ենք տեսլական, թե ինչ պետք է անենք, քննարկել ենք մեր կառավարման համակարգի պրոբլեմները, բացթողումները, աշխատանքներ ենք տանում, որպեսզի կառավարման սուբյեկտները մաքսիմալ թվայնացնենք, ամփոփել ենք ներդրումային ծրագրերը, ինչպես նաև պատկան մարմինների առաջ պահանջ ենք դրել՝ պարբերաբար հաշվետվություն ներկայացնել հանրությանը»,- նշեց վարչապետը:

Խոսելով գյուղատնտեսության ոլորտից, Կարեն Կարապետյանն ասաց, որ մեր երկրում գյուղատնտեսությունում զարգացման ամբողջ տեսությունը հիմնված է եղել հետևյալ գաղափարի վրա՝ յուրաքանչյուր գյուղացի լավ գյուղատնտես է. «Եթե մենք կասկած հայտնենք այդ պնդմանը, ապա ամբողջ այդ տեսությունը վերանայման խնդիր ունի: Մենք գյուղացուն տալիս ենք պարարտանյութ, սերմ, դիզվառելիք և ասում ենք՝ դու գիտես ինչ անես, բայց փաստ չի, թե ինքը գիտի ինչ անի»:

Նրա խոսքերով՝ հանրապետությունում կա 359 հազար գյուղացիական տնտեսություն և  ընդամենը՝ 350 ֆերմեր և կոոպերացիա, որոնցով, ըստ վարչապետի,  գյուղատնտեսությունը զարգացնելն անհնար է:

Անդրադառնալով առողջապահության ոլորտին, վարչապետն ասաց, որ այդ ոլորտի  ախտորոշումն էլ ցույց է տալիս՝ առողջապահության ոլորտում բավականին բացասական դերակատարում ունի պետության միջամտությունը, մասնավորապես,  ոչ օբյեկտիվ պետական պատվերները: Դա, ըստ Կարեն Կարապետյանի, բերում է ոչ մրցակցային պայմաններ: Մինչդեռ առողջապահության ոլորտում այն ճյուղերը, որոնք պետպատվերով մինիմալ են աշխատում, մասնավորապես, ատամնաբուժությունը, շատ մրցունակ են:

«Եթե մենք միջամտում ենք ոչ օբյեկտիվ դրդապատճառներով,  ում լավ աչքով ենք նայում, ապա նրա մոտիվացիան՝ ներդրումներ անել, զարգացնել ծառայությունները, նվազում են, իսկ ում վատ աչքով ենք նայում, նրա մոտիվացիան չի նվազում: Այդ իսկ պատճառով մենք առողջապահության ոլորտում ցանկանում ենք հասնել նրան, որ յուրաքանչյուր մարդ ինքը որոշի, թե որտեղ է ցանկանում բուժում ստանալ, այլ ոչ թե շտապ օգնության մեքենան նստելուց հետո նրան ասեն՝ տանում են այս կամ այն կլինիկան»,- ասաց վարչապետը: 

Խոսելով տեղեկատվական տեխնոլոգիաների ոլորտից,  Կարեն Կարապետյանը շեշտեց՝ այն զարգանալու չափազանց մեծ ներուժ ունի, մինչդեռ ՏՏ ոլորտի մասնագետների հետ հանդիպման ժամանակ հասկանում են, որ այսօր ամենամեծ խնդիրը մասնագետներն են:

Վարչապետի խոսքերով՝  եթե այսօր 1000 մասնագետի պահանջարկ ունեն և մեր բուհական համակարգը չի ապահովում դա, ապա հետագայում այդ 1000-ը դառնալու է երկու-երեք հազար: Կարեն Կարապետյանն հարց բարձացրեց. «Ինչի՞ մենք այստեղ ներդրումներ չենք անում, բուհական համակարգը չենք փոխում»: 

Այնուհետև վարչապետը ներկայացրեց, թե քանի ներդրումային ծրագիր են ընդունել, ինչ քայլեր են անում մարզերի համաչափ զարգացման համար:

«Մենք պետք է մի երկիր ստեղծենք, որտեղ ուսանողը, ստեղծագործ մարդը, հավելյալ արժեք ստեղծող մարդը իրեն բավարարված և հանգիստ զգա: Այն երկրներն են իրենց երջանիկ համարում, որտեղ այդ պայմանները կան: Մեր հիմնական կապիտալը մարդն է, և մենք հնարավորություն չունենք խելոք չլինելու: Այսինքն՝ մենք ինչ անենք, պետք է խելոք անենք: Տարածաշրջանը, հարևանները, լոգիստիկան, տրանսպորտը, ամեն ինչը պարտադրում են, որպեսզի մենք լինենք խելոք ու կիրթ: Այդ իսկ պատճառով մեր հիմնական կապիտալը մարդն է»,- ասաց Կարեն Կարապետյանը:

Վարչապետը դիմելով ուսանողներին՝ նշեց, որ սպասում են նրանց: Նա հայտնեց, որ ԵՊՀ ուսանողների բիզնես ծրագրերի համար մրցույթ են հայտարարելու:

«Այն բիզնես երեք նախագծերը, որոնք կհաղթեն, մենք պատրաստ ենք դրանք ֆինանսավորել: Մենք մեր թիմը համալրելու խնդիր ունենք և ցանկացած գաղափար, որ ունեք մեր երկրի զարգացման վերաբերյալ, պատրաստ ենք  քննարկել Ռազմավարական նախաձեռնությունների կենտրոնում»,- ասաց վարչապետը:  

Եզրափակելով խոսքը՝  Կարեն Կարապետյանն ասաց. «Ուրախ եմ ձեզ հետ հանդիպել, պայծառ, սիրուն դեմքեր եք, շուտ արեք, միացեք մեզ, որովհետև մենք ձեր կարիքն ունենք»: