Ձեր վստահելի աղբյուրը

Սուսերամարտ, վոյելբոլ և սեղանի թենիս մարզաձևերի մասսայականացմանը նպաստելու նպատակով ՀՀ սպորտի և երիտասարդության հարցերի նախարարությունում կազմակերպված քննարկումն անցկացրել է նախարարի տեղակալ Գաբրիել Ղազարյանը, ով հրավիրված ֆեդերացիաների ներկայացուցիչներին հորդորել է իրենց աշխատանքը կազմակերպելիս մի փոքր հեռանալ Երևանից և հնարավորինս ակտիվ աշխատել մարզերում:

«Հասկանալի է` սուսերամարտի առանձնահատկությունն այն է, որ դրանով մարզվելն առանց մարզագույքի հնարավոր չէ, սակայն սեղանի թենիսը և վոլեյբոլն ավանդաբար ամենամասսայական մարզաձևերն են: Անհրաժեշտ է օգտագործել բոլոր հնարավոր միջոցները` դրանք ավելի մատչելի և հասանելի դարձնելու համար»,- ասել է նախարարի տեղակալը:

Հայաստանի սուսերամարտի ֆեդերացիայի նախագահ Արմեն Գրիգորյանի խոսքերով՝ սուսերամարտի զարգացմանը մեծապես նպաստում է մեր երկրում միջազգային մրցաշարերի անցկացումը:

«Մենք դրա փորձն ունենք, արդեն 5-րդ անգամ Երևանում անցկացվում է միջազգային մրցաշար: Նախատեսում ենք Երևանում կազմակերպել նաև Եվրոպայի առաջնությունը»,- ասել է Գրիգորյանը:

Հայաստանի սեղանի թենիսի ֆեդերացիայի նախագահ Ֆելիքս Սարգսյանը ցավով նշել է, որ այս մարզաձևը հետզհետե կորցնում է երբեմնի իր մեծ մասսայականությունը, ինչը նա հիմնավորել է մարզագույքի պակասով:

Հայաստանի վոյելբոլի ֆեդերացիայի ներկայացուցիչները խոսել են կազմակերպվող մրցաշարերի, առաջնությունների և վերապատրաստման սեմինարների մասին: Լսելով նրանց՝ նախարարի տեղակալը նշել է, որ վոլեյբոլն այն խաղային մարզաձևն է, որը հասանելի է գրեթե բոլոր տարիքային խմբերին՝ անկախ նրանց մարզական վիճակից:

«Հիշե՛ք, մենք այսօր խոսում ենք ոչ թե մեծ սպորտի, այս մասսայական սպորտի զարգացման մասին: Մասսայական սպորտի զարգացմանը մենք կարող ենք հասնել համատեղ աշխատանքի շնորհիվ»,- Ղազարյանի խոսքերն է մեջբերում ՀՀ սպորտի և երիտասարդության հարցերի նախարարության պաշտոնական կայքը:

Հանդիպման վերջում նախարարի տեղակալը խնդրել է ներկաներին իրենց մարզաձևերի մասսայականացմանը նպաստող աշխատանքների վերաբերյալ երկշաբաթյա ժամկետում նախարարության համապատասխան վարչություն ներկայացնել առաջարկություների փաթեթ: