Ձեր վստահելի աղբյուրը

«Օրենքով սահմանված կարգով, ինչպես օրենքն է նախատեսում, կգնամ արձակուրդ», -այսօր կառավարույան նիստից հետո լրագրողների հետ ճեպազրույցում հայտարարեց Մշակույթի նախարար Արմեն Ամիրյանը՝ պատասխանելով հարցին, թե պատրաստվո՞ւմ է նախընտրական շրջանում մեկնել արձակուրդի։

Հիշեցնենք՝ Արմեն Ամիրյանը Հանրապետական կուսակցության համամասնական ցուցակի առաջին տասնյակում է։

Խորհրդարանական ընտրություններից հետո ձևավորվելիք կառավարության մասին հարցին ի պատասխան Ամիրյանն ասաց. «Եթե Հանրապետականը լինի մեծամասնություն, ձևավորի կառավարություն, ապա, անշուշտ, մեզ տրվելու է հնարավորություն վարչապետ Կարեն Կարապետյանի թիմով շարունակելու արդեն սկսված ծրագրերը»։

Ինչ վերաբերում է հարցին, թե ինչո՞ւ նախարարները ընդգրկվեցին Հանրապետականի համամասնական ցուցակի առաջնային հորիզոնականներում, Ամիրյանն ասաց, որ դա կուսակցության որոշումն է ու հավելեց. «Կարծում եմ ճիշտ որոշում էր»։

Նաև ասաց, որ իր ներկայությունը համամասնական ցուցակում իր կարծիքով դրական ազդեցություն կունենա ընտրարշավի արդյունքների վրա։

Հարցին, թե ինքը Հանրապետականում նոր մարդ է ի՞նչ նոր մտքեր է պատրաստվում ներմուծել կուսակցություն, Ամիրյանը պատասխանեց. «Թույլ տվեք նոր մտքերը հայտնել արդեն քարոզարշավի ընթացքում»։