Ձեր վստահելի աղբյուրը

«Կուսակցությունների, դաշինքների ընտրական ցուցակներն ինքնանպատակ չպետք է լինեն, դրանք ինչ-որ քաղաքական մեսիջներ են փոխանցում հասարակությանը»,- լրագրողների հետ հանդիպմանն ասաց քաղաքական և ընտրական տեխնոլոգիաների փորձագետ  Արմեն Բադալյանը:

Խոսելով կոնկրետ ուժերի ցուցակների  մասին, նա ասաց, որ դրանով մի քանի խնդիր են ցանկացել լուծել. «Իշխանության համակարգում ուժեղացնել պաշտպանության նախարարի դիրքերը՝ այդպես ուղղակի թուլացնելով վարչապետի դիրքերը, քաղաքական կշիռը: Ցուցակի առաջին երեք համարը, ինչպես նաև մինչև տասը, նախագահի թիմակիցներ են, չկա վարչապետի ոչ մի թիմակից: Նաև տարածքային ցուցակներում են հիմնականում նախագահի կողմնակիցներ ներկայացված: Սրա նպատակն է խորհրդարանում ՀՀԿ խմբակցությանը դարձնել ենթակա խմբակցություն, չլինեն ինքնուրույն գործող գործիչներ:

Բացի այդ, ՀՀԿ-ի ցուցակը  ցույց տվեց, որ ցանկանում են հնաբնակներին մղել երկրորդ պլան, բարձրացնել անմիջապես իրենից կախում ունեցող կուսակցական գործիչներին»:

«Ծառուկյան» դաշինքի պարագայում, նրա խոսքով, հիմնականում ԲՀԿ-ականներ են, ինտրիգ չի պարունակում այս դաշինքը, չստեղծվեց լայն դաշինք, ինչն ակնկալում էին Գագիկ Ծառուկյանի վերադարձով:

««Օհանյան-Րաֆֆի-Օսկանյան» դաշինքը նույնպես մի քիչ անհասկանլի է, քանի որ  Րաֆֆի  Հովհաննիսյանի անունն է նշվում, բայց նա ընդամենը ցուցակի 11-րդ տեղում է, իսկ երկրորդ տեղում Արմեն Մարտիրոսյանն է: Բացի այդ, երկու կուսակցության դաշինք է՝ «Համախմբում» և «Ժառանգություն»: Դաշինքի անունում նշելով Օհանյանի, Հովհաննիսյանի անունները, փորձել են այդպես շեշտադրել: Տեխնոլոգիապես ստացված չէ: Մեծ դաշինք ստեղծելու նպատակներ ունեին, սակայն չստացվեց»,- ասաց փորձագետը:

Ա. Բադալյանն ասաց, որ անհասկանալի է նաև ԿՈՆԳՐԵՍ-ՀԺԿ դաշինքը, քանի որ  ՀԱԿ-ը թուլացած է, իսկ ՀԺԿ նախագահը չունի այն կշիռը, խորհրդարանում իր գործունեությամբ աչքի չի ընկել, որ կարողանա անհրաժեշտ ձայն բերել դաշինքին. «Դաշինքով հանդես գալու դեպքում խորհրդարան անցնելու համար անհրաժեշտ է 7 տոկոս: Չեմ  կարծում, որ ՀԺԿ նախագահը այն կշիռն ունի, որ կարողանա ապահովել այդ երկու տոկոսը»:

Նրա գնահատմամբ, Կոմունիստական կուսակցությունն իրենից ուժ չի ներկայացնում, «Ազատ դեմոկրատները» թեև ճիշտ են արել, որ մի կուսակցությամբ են գնում ընտրությունների, սակայն չունի այն ազդեցությունը, որ հավակնի շատ տեղերի:

«Հայկական վերածնունդ»-ի, ՀՅԴ-ի պարագայում, նրա խոսքով, նույն գործիչներն են, որոնք նախկինում եղել են:

Ասուլիսին ներկա քաղտեխնոլոգ, վերլուծաբան Վիգեն Հակոբյանը խոսելով «Ելք» դաշինքի մասին,  ասաց, որ ճիշտ կլիներ, եթե  դաշինքի համամասնական ցուցակը ոչ թե Էդմոն Մարուքյանը, այլ Նիկոլ Փաշինյանը ղեկավարեր: Նրա խոսքով, Կոմունիստական կուսակցությունը քիչ տոկոս կարող է վերցնել, սակայն այդ ձայերը տանելու է «Ծառուկյան» դաշինքից:  Վերլուծաբանի խոսքով, ընդդիմադիր սեգմենտում գործող դաշինքները, կուսակցությունները բավականին խոցելի են:

Ա. Բադալյանի խոսքով, կուսակցությունների, դաշինքների ցուցակները վերլուծելով, կարելի է ասել, որ 90 տոկոսով նույն գործիչներ են, ինչ նախորդ հինգ-տաս տարիներին:

«Որևէ  որակական փոխոփություն ակնկալել իմաստ չունի»,- հավելեց նա: