Ձեր վստահելի աղբյուրը

Ապրիլի 2-ին շտկված կլինի ամեն ինչ, ազդանշանն էլ կլինի: Այսօր լրագրողների հետ հանդիպմանը հայտարարեց  Կառավարության աշխատակազմի ղեկավար-նախարար Դավիթ Հարությունյանը՝ անդրադառնալով փետրվարի 12-ին Գեղարքունիքի մարզի Սեմյոնովկա և Արմավիրի մարզի Վարդանաշեն համայնքներում կայացած ՏԻՄ ընտրությունների ժամանակ ընտրողների էլեկտրոնային գրանցում իրականացնող տեխնիկական սարքավորումների փորձարկման ընթացքում գրանցված  խնդիրներին ու թերություններին:

Դ. Հարությունյանը նշեց, որ նախապես փորձարկում նախատեսված չէր, սակայն սարքավորումներ պատրաստող ընկերությանը խնդրել էին մի փոքր խմբաքանակ ավելի շուտ պատրաստել՝ հետագայում հնարավոր խնդիրներից զերծ մնալու համար: Փորձարկման արդյունքում եկել են եզրահանգման, որ շտկումների կարիք կա:

Նախարարը հիշեցրեց, որ կրկնաքվեարկության ժամանակ պետք է կարմիր նշան հայտնվի, եթե ընտրողն այդ տեղամասում գրանցված չէ, ապա՝ դեղին նշան:

«Պարզ դարձավ, որ այդ նշանները պետք է խոշորացվեն, որպեսզի դիտորդները, վստահված անձինք կարողանան միանգամից նկատել»,-ասաց նա:

Դիտորդներն առաջարկել են կարմիր լույսի դեպքում նաև ազդանշան լինի, մոտավորապես ոստիկանական ավտոմեքենայի ազդանշանային ձայնի նման:

«Եղել է դեպք, երբ սարքավորումը չի կարողացել ավտոմատ կարդալ անձնագրի կամ նույնականացման քարտի համարը՝ լինում են մաշված, խազերով կամ վնասված: Այս պարագայում պետք է այդ տվյալները մուտքագրել ստեղնաշարով: Այս պարագայում էլ առաջարկություն եղավ ոչ ցայտուն ազդանշան լինել»,-ասաց Հարությունանը:

Նրա խոսքով, այս պահին աշխատում են դրանք շտկելու ուղղությամբ: Եղել են մանր խնդիրներ, որոնց մասին բարձրաձայնել են հանձնաժողովի անդամները՝ հերթերից խուսափելու համար:

«Ծրագրային պարզեցման խնդիր ենք դրել մի շատ դեպքերում, այն ինչ հնարավոր է կյանքի կոչել, անպայման կանենք»,-ասաց նա, հիշեցնելով, որ փորձարկման ժամանակ ծրագրային աշխատանքներն ամբողջությամբ ավարտված չէին:

«Այս պահին ենթադրում ենք, որ լուրջ խնդիր չենք ունենա»,-ասաց նա:

120  վերապատրաստված դասախոսներ ուսուցում կկազմակերպեն 6 հազար մասնագետների համար բոլոր մարզերում: