Ձեր վստահելի աղբյուրը

Պրակտիկորեն անհնար է, ավելին՝ ես նման ցանկություն չունեմ: Անդրադառնալով իր՝ ՍԴ նախագահ նշանակվելու մասին լուրերին լրագրողների հետ զրույցում ասաց կառավարության աշխատակազմի ղեկավար-նախարար Դավիթ Հարությունյանը:

Անդրադառնալով ընտրություններից հետո գործադիր մարմնում լինելու հարցին, Հարությունյանն ասաց, ՀՀԿ-ի հաղթանակի դեպքում կուսակցությունը կքննարկի ու որոշում կկայացնի:

Ինչ վերաբերում է ՀՀԿ ցուցակում իր ու այլ նախարարների ընդգրկված չլինելուն, ապա Հարությունյանն ասաց. «Կուսակցությունը քննարկում է, թե ում է նպատակահարմար գտնում տեսնել Ազգային Ժողովում, հանգել են հետևյալ եզրակացության՝ երեք գործող նախարար պետք է լինեն ցուցակում, բայց դա ամենևին չի նշանակում, որ նրանք ներկայացված են լինելու ԱԺ-ում»:

Ինչ վերաբերում է հարցին, որ տարիներ շարունակ  «Սաս» սուպերմարկետների սեփականատեր Արտակ Սարգսյանը ԱԺ-ում մի խոսք չի ասել, բայց կրկին ցուցակում է հայտնվել,  նախարարն արձագանքեց.

«Գիտեք, կա նման մոտեցում, ժողովրդավարությունը չի լուծում բոլոր խնդիրները, բայց ավելի լավ լուծում մենք չունենք, քան ժողովրդի ընտրությունը: Ժողովուրդը պետք է ընտրի, եթե ժողովուրդը  ընտրի, ապա կարծում եմ,  ձեր համար կարևոր կլինի ժողովրդի ընտրությունը, ոչ թե ձեր անձնական կարծիքը այս կամ այն թեկնածուի վերաբերյալ»,-ասաց նա: