Ձեր վստահելի աղբյուրը

Ուկրաինայում «Եվրատեսիլ-2017» երգի միջազգային մրցույթի  ստեղծագործական թիմի աշխատանքների դադարեցումը վկայում է այն մասին, որ Կիևը մրցույթի անցկացման նախապատրաստական աշխատանքներում բախվել է լուրջ դժվարությունների հետ:  ՏԱՍՍ-ի հաղորդմամբ, նման եզրահանգման է եկել ամերիկյան The New York Times թերթը:

Նյութում նշվում է, որ «Եվրատեսիլ» մրցույթն այսօր վտանգված է այն բանից հետո, երբ այս շաբաթ միջոցառման կազմակերպչական աշխատանքներով զբաղվող ուկրաինական թիմը   հայտարարել է աշխատանքների դադարեցման մասին կոռուպցիայի և անարդյունավետ կառավարման մեղադրանքների ֆոնին:

«Եվրատեսիլ-2017» մրցույթի անցկացման աշխատանքների վրա աշխատող ստեղծագործական թիմը փետրվարի 13-ին պաշտոնապես հայտարարել էր աշխատանքները դադարեցնելու մասին:

Հայտարարությունը ստորագրել էր 21 մարդ: Թիմի անդամները նշում են, որ 2016 թ. դեկտեմբերին նրանցից վերցրել են լիազորությունները՝ նշանակելով մրցույթի նոր փաստացի ղեկավարի, որին տվել են «Եվրատեսիլ 2017»-ի կառավարման բոլոր լիազորությունները: Արդյունքում թիմի աշխատանքն ամբողջովին արգելափակվել է:

Նշենք, որ մրցույթն այս տարի կանցկացվի մայիսի 9-ին, 11-ին և 13-ին Կիևում:  Ընդհանուր առմամբ, «Եվրատեսիլ-2017»-ին կմասնակցի 43 պետություն: Երգի միջազգային մրցույթին Հայաստանը կներկայացնի Առաջին ալիքի «Դեպի եվրատեսիլ» մրցույթի հաղթող Արծվիկը: