Ձեր վստահելի աղբյուրը

«Այսօր Ադրբեջանում ոմանք դեռ պատրանքներ ունեն, թե ընտրությունների վրա կենտրոնացած Հայաստանը լինելու է շատ զբաղված, հետևաբար՝ խոցելի: Այս սին պատրանքերից ելնելով՝ հակառակորդը միգուցե փորձի նաև նոր սադրանքների դիմել»,- ԵԿՄ 11-րդ համագումարում ունեցած ելույթում ասաց ՀՀ նախագահ Սերժ Սարգսյանը: 

Նախագահը նշեց, որ հսկայական գումարներ քամու տալու ճանապարհով  դատարկ ու մեկշաբաթանոց  կյանք ունեցող PR ակցիաների սիրահար պաշտոնական Բաքուն վերջերս Արցախի հարցը կոչեց  Ադրբեջանի ներքին խնդիր:

«Ցավոք, մարդկանց հիշողությունը կարճ է: Որևէ իրավական ու բարոյական հիմք չունեցող հենց այդ մտածողությունը ժամանակին հանգեցրեց հակամարտության սրմանը և պատերազմին՝ բերելով բազմաթիվ անտեղի զոհեր ու տառապանքներ հենց առաջին հերթին Ադրբեջանի ժողովրդին: Ձեզանից շատերը հիշում են, թե 90-ական թվականների սկզբներին, երբ շաբաթը մեկ Ադրբեջանում պաշտպանության նախարար էր փոխվում, նրանից յուրաքանչյուրն իր պարտականությունն էր համարում ելույթ ունենալ և ասել, որ մի շաբաթ հետո, մի քանի օր հետ ինքը Ստեփանակերտում թեյ է խմելու: Ինչպես  պատմությունը ցույց տվեց, ձեր և մեր ժողովրդի այլ հերոս զավակաների ջանքերով  այնպես ստացվեց, որ ոչ միայն   Ստեփանակերտում թեյ չխմեցին, այլ նաև զրկվեցին Աղդամում, Ֆիզուլիում, Ջաբրայիլում,  Կուբաթուում, Քելբաջարում և այլ վայրերում թեյ խմելուց:

Մենք, անկեղծ եմ ասում, Ադրբեջանին տառապանք չենք ցանկանում, սակայն և ոչ մեկին թույլ չենք տա տենչալ մեր ժողովրդի տառապանքը»,- ասաց նախագահ Սերժ Սարգսյանը:

Երկրի ղեկավարը նշեց, որ Արցախի խնդիրը հայ ժողովրդի գործն է, հայության դատն է, ինչպես որ Արցախի ժողովուրդը որոշի, հենց այդպես էլ կլինի Արցախի ապագան:

«Ինչպես այստեղ ներկաները, այնպես էլ այս դահլիճից դուրս գտնվողները սարի պես կանգնած են Արցախի մեր քույրերի, եղբայրների թիկունքին: Բոլոր հնարավոր սադրանքներն արժանի հակահարված են ստանալու, պատրանքների վրա հիմնված քաղաքականությունն ապագա չունի և չի կարող ունենալ: Ասվածի ապացույցն անցած տասնամյակների փորձն է»,- նշեց Սերժ Սարգսյանը:

Դիմելով ԵԿՄ-ականներին՝ ՀՀ նախագահն ասաց. «Ինչպես միշտ՝ կոչ եմ անում շարունակել վառոդը չոր պահել, քանի որ մեր պայքարը դեռ շարունակվում է»: