Ձեր վստահելի աղբյուրը

«Տարեցտարի իսկապես Գիրք նվիրելու տոնը վերածվում է իրադարձության, սոսկ օրացույցային նշում չի մնում։ Տոնին սկսում են ավելի շատ մարդիկ, կազմակերպություններ ու գրախանութներ միանալ»,- այսօր լրագրողների հետ հանդիպմանը նման կարծիք հայտնեց գրականագետ Արքմենիկ Նիկողոսյանը։

Փետրվարի 19-ին նշվում է Գիրք նվիրելու օրը։

Գրականագետն ընդգծեց, որ այս տարի միջոցառմանը նաև պետական մասնակցության գործոնն է ակնհայտ՝ ի դեմս մշակույթի նախարարության։

«Գիրք նվիրելը նորաձև դարձավ տարվա ընթացքում, մարդիկ սկսեցին տարբեր առիթներով իրար գիրք նվիրել, անգամ սիրո տոնին։ Այսօր չկա անգամ որևէ փոքր գրախանութ, որը տոնական տրամադրված չլինի փետրվարի 19-ին»։

Արքմենիկ Նիկողոսյանը հիշեցրեց այս տարվա առանձնահատկության, առաջին շարժական գրախանութի՝ «Գրաբուս»-ի մասին, որտեղ ներկայացված են լինելու հայաստանյան տարբեր հրատարակիչների գրքեր՝ հայերենով։

«Գրաբուսը» կսկսի իր մեկնարկը փետրվարի 19-ին՝ ժամը 12-ին Ազատության հրապարակից, մեկ ժամ այնտեղ մնալուց հետո կսկսի շրջել Երևանի համայնքներով։ Ժամանակացույցը ներկայացված է ֆեյսբուքյան էջում։

Նիկողոսյանը նշեց, որ Ազատության հրապարակում ժամը 12-ին գտնվողներին անակնկալ է սպասվում, սակայն փակագծերը չցանկացավ բացել։

Հանդիպմանը ներկա «Անտարես» հրատարակչության տնօրեն Արմեն Մարտիրոսյանը նշեց, որ բազմաթիվ հայտնի դեմքեր կդառնան «Գրաբուս»-ի գրավաճառը, այդ թվում նաև մշակույթի փոխնախարար Արթուր Պողոսյանը։

«Գրավաճառի ու գրադարանավարի մասնագիտությունն այսօր մի տեսակ նսեմացված է, սա արվում է նրա համար, որ այս մասնագիտությունները բարձրանան իրենց արժանի տեղին»,-ասաց նա։

Արքմենիկ Նիկողոսյանն անդրադառնալով գիրք նվիրելու օրվան ընդառաջ անցկացվող ֆեյսբուքյան ակցիային՝ «լայքահավաքությանը», նշեց, որ նեգատիվ արձագանքներ լինում են դրա վերաբերյալ, սակայն այն ունի հատուկ նպատակ։

«Բացի գիրք շահելուց, այս ակցիան հրաշալի հնարավորություն է հանրության ներկայացնել, թե ինչ գրքեր են լույս տեսել։ Լավ հնարավորություն է մեզ համար հասկանալու, թե որ գրքերն ու հեղինակներն են ավելի պահանջված, որոնք են թրենդից դուրս եկել։ Եթե նախկինում ակցիային երիտասարդ տղաներ, աղջիկներ էին մասնակցում, ապա այս տարի նկատելի է, որ մասնակցում և այսպես ասած «վիզ են դնում» գրքերի համար այն մարդիկ, ովքեր իսկապես դրանց կարիքն ունեն»,- ասաց Նիկողոսյանը։

Նա ներկայացրեց, որ այս տարվա «լայքահավաքության» մրցույթին եղել է մոտ 200 անուն գիրք, երկու ալբոմով՝ «Նվիրիր համաշխարհային գրականություն» և «Նվիրիր հայ հեղինակների գրքեր»։

«Համաշխարհային գրականությունից ամենից շատ կիսված գրքերի հնգյակը հետևյալն է «Կամելիազարդ տիկինը» (120 մարդ), «Դաշնակահարուհին» (97 մարդ), «Ավելի մուգ հիսուն երանգները» (92 մարդ), «Կեցության անտանելի թեթևությունը» (91 մարդ), «Հուլունքախաղը» (66 մարդ)։

Հայ գրականությունից ամենաշատը կիսվել են Լևոն Խեչոյանի «Արշակ արքա, Դրաստամատ Ներքինի», Հովիկ Չարխչյանի «Սուլամիթա՝ Սևակի մեծ սերը», Մհեր Իսրայելյանի «Մինչև մեռնելն, ապրել է պետք», Նարինե Կռոյանի «Դառնածինները», Գևորգ Գրիգորյանի «Դժոխքից վերադարձ կա» գրքերով»,-թվարկեց գրականագետը։

Վերջում «Անտարես» հրատարակչության տնօրենը ցանկություն հայտնեց, որ մեր ժողովուրդը խորհրադարանական ընտրությունների հետ միասին սկսի շատ կարդալ, քանի որ կարդացող ժողովրդին դժվար է կառավարելը։