Ձեր վստահելի աղբյուրը

Այսօր` փետրվարի 20-ին, հայ պրոֆեսիոնալ բռնցքամարտիկ Արթուր Աբրահամի տարեդարձն է: Նա տոնում է ծննդյան 37-րդ ամյակը:

Արթուր Աբրահամը (Ավետիք Աբրահամյան) ծնվել է 1980 թ. փետրվարի 20-ին` Երևանում: Գերմանիայի մայրաքաղաք Բեռլինում բնակվում է 2004 թ.-ից: Հայաստանի Հանրապետության քաղաքացի լինելուց բացի նա 2005 թ.-ից ունի նաև Գերմանիայի քաղաքացիություն:

Մանկության տարիներին լրջորեն զբաղվել է հեծանվասպորտով, եղել է Հայաստանի բազմակի չեմպիոն:  IBF վարկածով աշխարհի չեմպիոնի տիտղոսն առաջին անգամ նվաճել է 2005 թ.` նոկաուտով առավելության հասնելով նիգերիացի Իկեկե Քինգսլիի նկատմամբ: Այդ տիտղոսն Աբրահամը պաշտպանել է մինչև 2009 թ.:

Իր մարզական կարիերայի ընթացքում ունեցել է 50 մենամարտ, որոնցից 45-ում հաղթել է` համաշխարհային դասակարգման աղյուսակներում գրավելով առաջատար հորիզոնականներ: 7 տարի (2006, 2007, 2008, 2009, 2012, 2014, 2015) Աբրահամը ճանաչվել է Գերմանիայի լավագույն բռնցքամարտիկ` ըստ գերմանական հեղինակավոր «Box Sport» ամսագրի վարկանիշի:

Հայոց բանակում ծառայած պրոֆեսիոնալ բռնցքամարտիկը Հայաստանի զինված ուժերի «Անդրանիկ Օզանյան» շքանշանակիր է (2007թ. հունիսի 1-ից):
2007 թ. Հայաստանում օլիմպիական շարժման զարգացմանը մատուցած ծառայությունների համար Արթուր Աբրահամին պարգևատրել է ՀԱՕԿ-ի շքանշանով:
2011 թ. սեպտեմբերի 16-ին` ՀՀ անկախության 20 ամյակի միջոցառումների շրջանակում ՀՀ նախագահ Սերժ Սարգսյանի կողմից պարգևատրվել է 1-ին աստիճանի մեդալով` «Հայրենիքին մատուցած ծառայությունների համար»:

2013 թ. հունվարի 9-ին պարգևատրել Սփյուռքի նախարարության «Պողոս Նուբար» մեդալով: 2014 թ. հոկտեմբերի 26-ին ՀՀ սպորտի և երիտասարդության հարցերի նախարար Գաբրիել Ղազարյանը Արթուր Աբրահամին հանձնել է շնորհակալագիր` միջազգային հարթակներում Հայաստանի և հայկական սպորտի պատիվը բարձր պահելու, փայլուն հաղթանակների ու Հայաստանում բռնցքամարտի զարգացմանը մեծապես աջակցելու համար: 2015 թ. հոկտեմբերի 14-ին արժանացել է «Երևանի պատվավոր քաղաքացի» տիտղոսին:

Բարի տարեդարձ, Արթուր Աբրահամ: Հուսով ենք` քո հաղթանակներով դեռ կշարունակես փայլել միջազգային մրցահարթակներում` ավելացնելով տիտղոսներիդ քանակը, որոնցից յուրաքանչյուրը մեծ արժեք ունի ոչ միայն քո, այլև բազմահազար երկրպագուներիդ համար` աշխարհի բոլոր ծայրերից: