Ձեր վստահելի աղբյուրը

Մարտի 18-ին կանանց միամսյակի առթիվ, Կարեն Դեմիրճյանի անվան մարզահամերգային համալիրում տեղի կունենա ֆրանսիացի հանրահայտ դաշնակահար Ռիչարդ Կլայդերմանի և Հայաստանի պետական կամերային նվագախմբի համերգը: Համերգի ընթացքում կհնչեն  դաշնակահարի հանրահայտ և սիրված Show time Murmurs, L for Love, Chariots of fire, Ballade pour Adeline, Corazon de Nino, Love at first sight, Childhood memories, Cinema Paradiso, Spartacus, Romeo and Juliet, Blue Rondo, America և այլ ստեղծագործությունները...

Նշենք, որ Ռ. Կլայդերմանը Հայաստանում առաջին անգամ եղել է նախորդ տարի, հույս էր հայտնել, որ դա չի լինի իր վերջին այցը:

Հայաստանի պետական կամերային նվագախմբի գեղարվեստական ղեկավար և դիրիժոր Վահան Մարտիրոսյանը Panorama.am-ին ասաց. «Նրա դուրը շատ էր եկել այստեղ հանդես գալը, զգացել էր, որ ունկնդիրն  իրեն շատ է սիրում: Դուր էր եկել ամեն ինչ՝ կազմակերպվածությունը, քաղաքը, հայաստանյան արևը: Հայաստանը շատ սիրեց ու մեծ հաճույքով որոշեց վերադառնալ. երբ առաջարկեցինք, անմիջապես համաձայնվեց: Առաջին համերգից հետո շատ ունկնդիրներից խնդրանք ստացանք, որ նորից հրավիրենք Հայաստան: Կլայդերմանին սպասում են այստեղ»:

Նա նշեց, որ ունկնդրին սպասվում են անակնկալներ:

Դասական, էթնիկ և ֆիլմերի երաժշտության գործիքավորող, կատարող դաշնակահար Ռիշար Կլայդերմանը ծնվել է 1953-ին, Փարիզում: Դաշնամուրի առաջին դասերը ստացել է երաժիշտ հորից` դեռ վաղ տարիքում, իսկ ընդամենը 12 տարեկանում արդեն կոնսերվատորիայի ուսանող էր: Կլայդերմանը իր հիմնական ժամանակը նվիրել է կատարողական գործունեությանը: Paul de Sennevilem-ի գրած աշխարհահռչակ «Բալադ Ադելինի համար» ձայնասկավառակի թողարկումը նրան հռչակել է ամբողջաշխարհով մեկ: Ձայնասկավառակը վաճառվել է աշխարհի ավելի քան 30 երկրներում 22 մլն օրինակով: Կլայդերմանը ձայնագրել է ավելի քան 1300 մեղեդիներ, և ստեղծել է նոր ռոմանտիկ ռեպերտուար, յուրօրինակիր ոճով միավորելով դասական և փոփ երաժշտությունը: Հանաճանաչ դաշնակահարը նշվել է համաշխարհային ռեկորդների Գինեսի գրքում` որպես «the most successful pianist in the world» («աշխարհի ամենահաջողակ դաշնակահարը»):