Ձեր վստահելի աղբյուրը

«Մնջախաղի պետական թատրոնը կլինի մեր քաղաքի փոքրիկ, գողտրիկ անկյուններից մեկը: Մեր 150 տեղանոց դահլիճը միշտ կլինի ծանրաբեռնված: Բացի ներկայացումներից, կկազմակերպենք նաև համերգներ, ցուցահանդեսներ»,- լրագրողների հետ հանդիպմանն ասաց է Մնջախաղի թատրոնի գեղարվեստական ղեկավար Ժիրայր Դադասյանը:

Նա վստահություն հայտնեց, որ թատրոնը կլինի մի վայր, որտեղ հնարավորություն կունենան զբաղվել այս հինավուրց ժանրով բոլոր այն երիտասարդները, ովքեր զրկված են այդ հնարավորությունից:

Նշենք, որ Մնջախաղի թատրոնը, տասնամյակներ շարունակ  չունենալով սեփական տարածք, բեմադրությունները ներկայացվում է Երևանի պատանի հանդիսատեսի թատրոնում՝ վարձակալության հիմունքներով։  Վերջին վերակազմավորումների արդյունքում Ազգային գրապալատը միացել է Հայաստանի ազգային գրադարանին,   ՀՀ նախագահի հանձնարարականով, Գրապալատի մինչ օրս զբաղեցրած տարածքը տրամադրվել է Մնջախաղի պետական թատրոնին: Ամբողջությամբ պետական միջոցներով իրականացվող շինաշխատանքները կմեկնարկեն առաջիկայում:

«Գաղտնիք եմ ուզում բացել. մշակույթի նախարարն առաջարկել էր, որպեսզի այս տարի նախագիծն արվի, եկող տարվա բյուջեով՝ նախատեսված ծախսերը: Նախագահը պնդել է, որ պետք է շինաշխատանքները սկսվեն և ավարտվեն այս տարի»,- ասաց Ժ. Դադասյանը:

Նրա խոսքով, նախարարն ասել է, որ թատրոնի գեղարվեստական ղեկավարն աշխատելու է ճարտարապետի հետ, որպեսզի  նախագիծը լինի լիարժեք. «Մենք պետք է մտածենք թատրոնի կոնցեպտը: Արդեն ունենք որոշակի պատկերացումներ:

Նա նշեց, որ թատրոնի նոր շենքի  նախագծային աշխատանքները կավարտվեն մինչև ամառ, որից հետո կսկսվեն վերանորոգման աշխատանքները:

Դերասանուհի Իննա Հախնազարյանն ասաց, որ 18 տարի աշխատում է այդ թատրոնում, տարբեր բեմերում խաղալուց հետո պարզապես անասելի երջանություն է ունենալ թատրոնի սեփական շենք, երջանկությունը կկրկնապատկվի, երբ սկսվեն վերանորոգման աշխատանքները, կեռապատկվի, երբ արդեն լինեն իրենց բեմում: