Եզակի թատրոնն ենք, որ անընդհատ հայտնվում ենք խոսող թատրոնների շարքում. Ժ. Դադասյան

Մշակույթ 16:37 20/02/2017 Հայաստան

Եզակի թատրոնն ենք, որ անընդհատ հայտնվում ենք խոսող թատրոնների շարքում. Ժ. Դադասյան

«Երևանի մնջախաղի թատրոնն առաջիկա ամիսներին մասնակցելու է Չելյաբինսկում, Շրի Լանկայում կայանալիք թատերական միջազգային փառատոներին: Ներկայացվելու է «Արդաղիոն» բեմադրությունը»,- լրագրողների հետ հանդիպանը տեղեկացրեց թատրոնի գեղարվեստական ղեկավար Ժիրայր Դադասյանը:

Նա նշեց, որ Չելյաբինսկի միջազգային փառատոնը խիստ մասնագիտացված է, լաբորատորիա-փառատոն է, 120 դիմումից ընտրվել է 16 թատրոն, որից մեկը հենց երևանյան թատրոնը: Ժ. Դադասյանը նաև տեղեկացրեց, որ Շրի Լանկայի փառատոնն այս տարվա պաշտոնական պաստառը ձևավորել է հենց Երևանի Մնջախաղի թատրոնի ներկայացման լուսանկարով:

«Ուրախալի է այն, որ վերջին տարիներին առավել հաճախ մասնակցում ենք թատերական փառատոների, քան մնջախաղի, մեզ դիտարկում են որպես ուղղակի թատրոն: Թատրոն է՝ ուղղակի առանց խոսքի: Եզակի թատրոնն ենք, որ անընդհատ հայտնվում ենք խոսող թատրոնների շարքում»,- ասաց թատրոնի գեղարվեստական ղեկավարը՝ հավելելով, որ այնպիսի թատրոն, ինչպիսին իրենց թատրոնն է, աշխարհում քիչ կան:

«Մնջախաղի ժանրը շատ բազմազան է, ունի շատ դրսևորումներ»,- հավելեց նա:

Նրա խոսքով, արդեն պատրաստվում են ամռանը կայանալիք մնջախաղի փառատոնին, ստացել են շատ հայտեր:

«Մեզ պետական խողովակներով դիմել են Վիետնամից, որ իրենց երկրում մնացել է վերջին միմը, շատ են ցանկանում, որ մասնակցի մեր փառատոնին: Բնականաբար, նայեցինք, բավականին հետաքրքիր արտիստ է, անպայման կհրավիրենք: Կունենանք հետաքրքիր հյուրեր, թատերախմբեր տարբեր երկրներից, աշխարհագրությունը շատ հարուստ է»,- ասաց Ժ. Դադասյանը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: