Ձեր վստահելի աղբյուրը

«Այս  պահի դրությամբ  դեռ հստակ որոշում չունեմ, թե ինչով պետք է զբաղվեմ, բայց միանշանակ է, որ անմասն չեմ մնալու քաղաքականությունից»,-«Ազատություն»  ռադիոկայանի ֆեյսբուքյան ասուլիսի ժամանակ ասաց «Ժառանգություն» կուսակցության նախկին անդամ Զարուհի Փոստանջյանը՝ պատասխանելով հարցին, թե խորհրդարանական ընտրություններից հետո ինչո՞վ եք զբաղվելու:

Նա նշեց, որ հանրությանը կտեղեկացնի, թե ինչով է շարունակելու զբաղվել: Զ. Փոստանջյանը հստակ չպատասխանեց հարցին, թե շարունակելո՞ւ է զբաղվելու փաստաբանությամբ:

Օգտատերերից մեկն առաջարկեց Զ. Փոստանջյանին միանալ ՀՅԴ-ին: Նա ասաց. «Գիտեք, դժվար է  միանալ: Նախ կարիքը չեմ գտնում միանալ որևէ միավորի: Ի սկզբանե ասել եմ, որ մենք ունենք մեր տեսլականը, պատկերացումները, որոնք շարունակում են մնալ, չնայած նրան, որ  այն կուսակցությունը, որին ես անդամակցում էի, այլևս դադարել է կրել այդ արժեքային համակարգը: Ես այդ գաղափարների համար, իհարկե, շարունակելու եմ պայքար տանել»:

Նա նաև ասաց, որ պետք չէ արհեստական, չհավասարակշռված քայլեր անել: Հարցին, հավանակա՞ն է ձեզ տեսնել «Ելք»-ի կողքին, նախկին ժառանգականը նշեց.  «Արդեն իմ որոշումը հրապարակել եմ»: 

Հիշեցնենք, որ նախօրին Զարուհի Փոստանջյանը հայտարարել էր «Ժառանգություն» կուսակցության անդամակցության դադարեցման մասին:

Պատասխանելով հարցին, թե դժվա՞ր էր նման որոշում կայացնելը, Զ. Փոստանջյանն ասաց. «Դժվար որոշում էր, այդ որոշումը կայացնելու համար, իհարկե, կային հիմքեր, այդ հիմքերը հիմնականում վերաբերում էին այն ճանապարհին, որ անցել է «Ժառանգությունը» և  այսօր կուսակցությունը փաստացի մերժում է իր անցած ուղին, արժեքային համակարգը: Այդ դեպքում պետք է կայացնեի մի որոշում, որը վերաբերվելու էր նաև իմ պայքարի ընկերներին: Շատ դժվար էր այդպիսի որոշում կայացնելը:  Տխուր է, որ  ես պարտավորված էի կայացնել այդպիսի որոշում»:

Հարցին, թե ինչպիսի՞ն էր կուսակցության առաջնորդ Րաֆֆի Հովհաննիսյանի արձագանքը այս որոշման հետ կապված, Զ. Փոստանջյանն ասաց. «Չունեմ որևէ արձագանք: Արձագանքը,  կարծում եմ, այն էր, որ նա ցանկանում էր, հավանաբար, որ նման որոշում լիներ»:

Պատասխանելով օգտատերերից մեկի հարցին, թե ի՞նչ կապ ունի ՀՀ նախկին պաշտպանության նախարար Սեյրան Օհանյանը 2008 թվականի Մարտի 1-ի դեպքերին, նա ասաց. «Այնքան կապ ունի, որ ինքը եղել է բարձրաստիճան պետական պաշտոնյա, իսկ մարտի 1-ի դեպքերը  դրանք լայնածավալ դեպքեր էին, որոնք կապված էին մարդու իրավունքների զանգվածային խախտումների հետ, որոնք ոչ միայն սպանությունների էին, նաև խոսքի ազատությունը, ընտրակեղծարարությունը, բռնությունները, զանգվածային  ձերբակալությունները, կալանավորումները: Այդ ժամանակ լինելով  բարձրաստիճան պետական պաշտոնյա և այդ ամենը տեսնելով ու  այդ մասին չբարձաձայնելով,  իհարկե, նաև ունես կապ, մեղքի բաժին»:

Հարցին, թե ո՞ր քաղաքական ուժին եք տալու ձեր ձայնը, Զ. Փոստանջյանն ասաց. «Այս պահին չունեմ կողմնորոշում»: