Ձեր վստահելի աղբյուրը

Ֆուտբոլային «Goal.com» կայքը վերլուծական է հրապարակել Հայաստանի ֆուտբոլի հավաքականի ավագ, անգլիական Մանչեսթր Յունայթեդ ակումբի հարձակվողական ոճի կիսապաշտպան Հենրիխ Մխիթարյանի մասին, ակումբի արձանագրած արդյունքներում հայ ֆուտբոլիսի խաղային որակներն ու ներդրումը դիտարկելով աշխարհի ամենաթանկ ֆուտբոլիստ Պոլ Պոգբայի արդյունավետության լույսի ներքո։
 
Կայքը հիշեցնում է, որ Մանչեսթրը ֆրանսիացուն նախորդ ամառ ձեռք էր բերել ռեկորդային 89 միլիոն ֆունտ ստերլինգով, և չնայած Պոգբան ժամանակ առ ժամանակ փայլում է խաղային առանձին դրվագներում, դեռ պետք է առաջիկա տարիներին ապացուցի իր վրա ծախսված գումարների արդյունավետությունը։ Աղբյուրի պնդմամբ, եթե Մանչեսթր Յունայթեդի մարզիչ Ժոզե Մոուրինյոն գնահատելու լինի իր ամառային ձեռքբերումները, ապա այս պահին կարող է բավարարվել միայն Մխիթարյանով։

«26 միլիոն ստերլինգով ամռանը գնված Հայաստանի հավաքականի ավագը վերջին շաբաթներին իր ցուցադրած խաղով կարող է շատ անտեղյակ երկրպագուների համոզել, որ հենց նա, այլ ոչ Պոգբան է ձեռք բերվել ռեկորդային գումարով», - գրում է կայքը, վերհիշելով հայ ֆուտբոլիստի ոչ այնքան բարեհաջող մեկնարկը անգլիական ակումբում և հաջորդած փոխակերպումը։

«Ի տարբերություն իրենից առաջ Դի Մարիայի և Մեմֆիս Դեպայի, Մխիթարյանն ի զորու եղավ պատասխանելու Մանչեսթրում իր կայունությունը վիճարկող բոլոր հարցադրումները», - գրում է կայքը, հիշատակելով Բլեքբերնի դեմ վերջին  գավաթային հանդիպման ժամանակ հայ ֆուտբոլիստի գործողությունները խաղադաշտում և որպես ադրյունք հանդիպման լավագույն խաղացող ճանաչվելու փաստը։

«Մխիթարյանի կողմից այդպիսի խաղային որակների ցուցադրումը, որն ընդամենը մեկն է նախորդ տարվա նոյեմբերից սկսած շարքում, ապացուցում է Մոուրինյոյին և Մանչեսթրի երկրպագուներին, որ 28-մյա Մխիթարյանն իր կարիերայի լավագույն փուլն է անցկացնում», - գրում է կայքն ու հավելում.«Մխիթարյանն ունի համապատասխան ներուժը դառնալու այն ահազդու  հարձակվողական շարժիչը, երբ Մանչեսթր Յունայթեդ ֆուտբոլային ակումբը Ալեքս ֆերգյուսոնի հեռանալուց հետո չորս տարի անց վերջապես վերակազմավորվի»։