Ձեր վստահելի աղբյուրը

ԵԱՀԿ Ժողովրդավարական հաստատությունների և մարդու իրավունքների գրասենյակը` ԺՀՄԻԳ-ը ՀՀ ապրիլի 2-ին կայանալիք խորհրդարանական ընտրությունների դիտորդական առաքելության ընթացքում հանդես կգա միջանկյալ զեկույցով, իսկ վերջնական զեկույցը կլինի երկու ամիս անց:

«Այդ զեկույցը հիմնված կլինի մեր գնահատականների վրա, կպարունակի վերջնական առաջարկություններ, խորհրդատվություններ: Հետո արդեն մեր առաջարկությունները հաշվի առնելը կամ չառնելը, դրանց հիման վրա գործողություններ կատարելը կամ չկատարելը  մնում է  Հայաստանի իշխանություներին, կառավարությանը, քաղաքական կուսակցություններին»,- Երևանում լրագրողների հետ հանդիպմանն ասաց  դիտորդական առաքելության ղեկավար դեսպան Յան Պետերսենը:

Պատասխանելով հարցին, թե Հայաստանն ունի նոր Ընտրական օրենսգիրք, որն ընդունվել է իշխանության-ընդդիմություն կոնսենսուսի արդյունքում,  արդյո՞ք ԵԱՀԿ/ԺՀՄԻԳ-ի առաջարկությունները, դիտարկումներն այդ օրենսգրքում ներառված են, նա ասաց. «Նախկին առաջարկություններին, իհարկե, կանդրադառնանք մեր զեկույցներում:  Դեռևս որևէ նախնական գնահատականներ չեմ ներկայացնելու, անդրադարձ կարվի մեր զեկույցներում»:

Նա նշեց, որ գնահատականը հիմնված է լինելու ամբողջական իրավիճակի, ընտրությունների ընթացքի, քաղաքական համատեքստի հիման վրա՝ օգտագործելով իրենց ստանդարտ մեթոդաբանությունը:

«Ցանկացած նախընտրական շրջան և ընտրություն գնահատում ենք տեղում առկա  փաստացի իրականության հիման վրա և այդ տեսանկյունից  ցանկացած զարգացում, որ տեղի է ունենում, հաշվի առնելը մեզ համար կարևոր է»,- ասաց դիտորդական առաքելության ղեկավարը:

Հարցին, թե  որքանո՞վ եք ծանոթ ընտրական գործընթացի նորամուծություններին,  եթե ծանոթ եք, որքանո՞վ են երաշխիքներ ստեղծում, որ կկանխվի ընտրակեղծարարությունը, ծանո՞թ եք  տարածքային ընտրակարգին, Յ. Պետերեսոնն ասաց. «Այո,  ծանոթ ենք: Մեր թիմում ունենք երկու ուղղությունով էլ փորձագետներ,  կկարողանանք մանրակրկիտ գնահատել և մեզ ներկայացվող իրականությունը, և այդ նորմերի կիրառումը, կատարումը: Կարծում եմ՝  մենք ճիշտ ենք դիրքավորված, որպեսզի կարողանանք բոլոր հիմնական առանձահատուկություններին լավ հետևենք: 

Ի՞նչ ենք կարծում նորամուծությունների մասին:  Նախնական գնահատականներ չենք հայտնելու: Եկել ենք բաց մտքով, ունենք փորձագետների պաշտաճ թվաքանակ, պատշաճ տեղեկատվություն, որպեսզի ներկայացնենք գնահատականներ:  Ինչպես ասացի՝ գործելու ենք ստանդարտ մեթոդաբանության հիման վրա, որպեսզի  վերջնական զեկույցում ներկայացվող  գնահատականները հիմնված լինեն փաստացի տեսածի, փաստերի, տեղեկությունների վրա, որպեսզի չցատկենք դեպի եզրակացություններ»: