Ձեր վստահելի աղբյուրը

«Արտառոց որևէ բան չկա, ահագնացող երևույթ չեմ նկատել»: Panorama.am-ի հետ զրույցում արձագանքելով պատգամավոր Նիկոլ Փաշինյանի հայտարարությանը, ասաց  ՀՀ ոստիկանության անձնագրային և վիզաների վարչության պետ Մնացական Բիչախչյանը:

Հիշեցնենք, որ Փաշինյանը հայտարարել էր,  այս տարվա հունվարի 10-ից փետրվարի 10-ն ընկած ժամանակահատվածում  հաշվառման վայրը փոխել է ՀՀ ավելի քան 7 հազար քաղաքացի:

Բիչախչյանն ասաց, որ Փաշինյանին տրամադրել են ինչպես 2017-ի, այնպես էլ 2016-ի նույն ժամանակահատվածի վերաբերյալ տվյալներ:

«Հայաստանի  ողջ տարածքում 2017թ.-ի հունվարի 10-ից փետրվարի 10-ը արձանագրվել է  հաշվառման վայրի 7077 փոփոխություն, իսկ 2016թ.-ի հունվարի 10-ից փետրվարի 10-ը գրանցվել է   հաշվառման վայրի 5834 փոփոխություն: Խոսքը վերաբերում է միայն ընտրելու իրավունք ունեցող անձանց: Եթե մենք խոսում ենք ահագնացող մեծ թվի մասին, ապա չեմ կարծում 7077-ից հանենք 5834, կստացվի մեծ թիվ: Սա իմ կարծիքն է»,-ասաց Մ. Բիչախչյանը:

Ոստիկանության պաշտոնյայի խոսքով, իրենք իրավասու չեն քաղաքացու դիմումը մերժել, եթե ներկայացվում են օրենսդրությամբ սահմանված փաստաթղթերը:

«Իրավասու չենք նաև մեկնաբանելու դա պայմանավորված է ընտրություններո՞վ, թե՞ այլ հանգամանքով: Իրավասու չենք պահանջել այլ փաստաթղթեր, հիմնավորումներ, անկախ այն բանից, թե ինչ նպատակով է տեղի ունենում փոփոխությունը»,-ասաց նա:

Բիչախչյանն անդրադարձավ այն լուրերին, որ Զեյթունի հանրակացարանում գրանցվել է 1000 անձ: Ստուգել են, տեսել, որ հունվար-փետրվարի 10-ն ընկած ժամանակահատվածում ընդամենը 8 մարդ է հաշվառվել:

«Եկեք կողքի խոսակցությունները դնենք մի կողմ, զբաղվենք լուրջ գործերով: Հրապարակել ենք ընտրողների ցուցակները»,-ասաց Մ. Բիչախչյանը:

Մամուլում հրապարակումներ եղան, որ «ՍԱՍ» սուպերմարկետների սեփականատեր հանդիսացող պատգամավոր Արտակ Սարգսյանն իր աշխատակիցներին ստիպում է հաշվառվել Արաբկիր վարչական շրջանում, որտեղ ռեյտինգային ցուցակով առաջադրվել է: Բիչախչյանից հետաքրքվեցինք, կա՞ վիճակագրություն, թե որ հասցեից են դուրս եկել քաղաքացիները և որտեղ են գրանցվել:

«Սա ամբողջ հանրապետության տարածքում է: Հիմա պատկերացնո՞ւմ եք, 7 հազար քանիսին հատ-հատ հանենք, վերլուծություն անենք: Հավատացեք, նման վիճակագրություն չկա»,-պատասխանեց նա: